Fuste

Mirabas-te na auga de l ribeiro ou de la fuonte para beres l berde de ls tous uolhos, speilhos sien tinta i sien queixilho.
Medreste sien tiempo para medrar i assí i todo ls tous braços bundában para arrodiar l trigo seco i atá-l la garanheira.

Las scaleiras que ousabas para chubir a ls uolmos, a pelar fuolha, anquanto ls uolhos drumien la séstia, salírun de la furnada an que te naçírun ls braços.

Colgábas ls dies a la antrada de la cuzina para que te alumiássen las nuites, quando la lhuç de la candeia nun chegaba para beres ls pontos de las meias i camisolas que fazies para to la família.
Soltabas l die i nun l dábas tiempo para çcansar porque debrebe el aparecie an riba l cabeço de l Naso a ri-se para ti.

Fuste mulhier, fuste forno, fuste çafra, arado, çadón.
Fuste pie d´amigo an sigurança, an carinos fuste seda, an rejistença pardo, an frescura algodón.
Fuste mulhier de cuorpo anteiro.

Quando l´Eimbierno tardiego se te arrimou, baliste-te de dues guelhadas que habies guardado, a quien chamabas de cumpanhas, amigas para siempre, a caminar ua de cada lhado.
Inda te beio a caminar cun eilhas, cuostas drubadas, uolhos berdes a mirar l chano. Reconheço-te po l puolo que se alhebanta quando caminas a arrastrar ls pies. Beio bien l puolo!

Beio-te cumo tu te bies quando te mirabas no ribeiro, cumo se fura un speilho.
Beio la tue eimage, sien percisar de speilho.

Cun eilhes

Cun ls mius passos
Fago ua manta

Caliente,
De tanto saracutiar.
Cun ls mius suonhos

Teço un lhençol de seda
Ameroso i perfumado
Cun oulor a campo i a mar.
Cun eilhes me tapo
Drumo
Sperto.
Cun eilhes anfrento la bida

I me fortaleço.

Fiesta de San Grigoiro. 12.08.09

Retratos sacados por Alcides Meirinhos ( Nieto de tiu Alfaiate de la Speciosa)

Ties mirandesas aldeanas

A spera de l cuncurso

Las cumbersas de cumadres.

La buossa burra cun esses baraços azules...!... Merecie melhor riata...

Adélia de Caçareilhos ye esta de xambre de flores azules i cor de rosa.
Ye la cantadeira.

Cuncurso de Burros ne l Naso 2009.09.05

a çfilar

a camino de la passarele.

La de baixo ye ambergunhada i nun quier çfilar.

Antre l çfile i l´antrega de l prémio come-se un fenico

Apuis de la bitória

Digna de l títalo de melhor burra de raça mirandesa!...

Nó!!!

Camina i nun sabe por adonde...
nun conhece ls carreirones.
Sigue un grifo i l´águila que bóla
Camina...
Antre figueiras i fenascos
Antre fragas i chougarços.
Un carreirón mais streito... sigue-lo a miedo!
Un penedo...
Faias,... un percepício!
La cabeça anquemeça a rodar
L riu a puxar
Las piernas a tremer...
Nó!!!
Un poulo para trás...
Las faias
L riu medonho, de fondo
La grima al percepício!...

Fásta-te soudade!

Fásta-te soudade!
Nun bés que anquemodas?
Por que carga d´auga se há-de achar
que datrás ye que se era feliç!
Por acauso nun se sufrie,
i nun se ancomeçaba a chorar?

Atenta siempre:
Se hoije nun stás miu bien
manhana starás melhor.
Se hoije te zprézian,
manhana dan-te balor.

L´onte yá passou
manhana há-de benir
l´hoije nun l çprezes
percura bibi-lo sien sufrir.