Moçambique

Moçambique
Parque da Gorongosa

Douro

Douro
An cama de mofo

quinta-feira, 31 de dezembro de 2009

L derradeiro deste anho

Cheira a afelhós na sartiana
Cheira a outro anho
A ancomeçar manhana

Cheira a manjares
Fiede a fome
Daquilho que a un sobra
Mas que outro nun come

quarta-feira, 30 de dezembro de 2009

Eirá a ser

Stamos acerquita de l fin de anho, este anho de 2009, que fui l´anho an que you fiç sessenta anhos, nun son muitos, mas tamien nun sou poucos. Tamien fui l´anho an que aposentei, custoso para muita giente, sobretodo para aqueilhes que nun ténen outros antresses ou nun ls crian i assi se beian cun to l tiempo i sien tener cun que l acupar. Nun ye l miu causo, tengo muito, anque astanho nun tenga aporbeitado l tiempo dua forma mui porbeitosa.
Fui ´l anho an que ancomecei a screbir an Mirandés, no die 1 de Janeiro fiç l miu blog an pertués i ancomecei a publicar stórias i poemas ne l Luso Poemas que andában an gabetas i que naide coincie. Poucos dies apuis criei l blog Especiosameuamor, adonde agora stou a screbir i atrabeç del coincie giente que apuis ancuntrei i de quien gusto muito. Atrabeç del fui cumbidada por Amadeu Ferreira a screbir un lhibro de poesie i que yé stá porparado para antregar na eiditora. Fui un anho de alguas supresas, anque you nun ache que tebisse sido un anho mui çécional.
Anho Nuobo, bida nuoba, hai que ancomeçar melhor, para seguir ls dies cun más aplicaçon de ls antresses pessoales que tengo.
Nun sei porquei, mas çque me aposentei, tube mais clara cuncéncia que yá staba nua eidade abançadota i que nun poderie çperdiçar l tiempo; assi tengo que fazer!
Fazer por ancomeçar bien cada anho, adbertido, an fiesta i de perferéncia a beilar. Ye assi que fazerei astanho, cuonto ir a beilar cun l miu tiu que algo custoso fui cumbencé-lo mas que decerteza bai a gostar, ua beç que eirá ancuntrá-se cun muita giente de l sou tiempo i inda para más stá na sue tierra.
Para ua fiesta stou siempre pronta, assi cumo stou pronta para qualquiera ajuntouro i subretodo cun amigos.
L´anho de 2010 bai a ser buono!... L que ancomeça bien,… acaba bien. Assi será.
Para mi eirá a ser un anho de grande criatibidade i creçer de saber, pormeto you a mi mesma.

sábado, 19 de dezembro de 2009

La lhebrica na nebada



La niebe bieno
I bieno a muntónes
Ls coneilhos quedúrun
Chenos de cunfusónes

Quedórun ls coneilhos
I las lhiebres tamien
Quedában ancandiladas
Sien saber l que fazien

La lhebrica pequeinha
Fui-se eilha solica
Perdiu-se de la mai
I nun bei nadica

La lhuç de la niebe
Stá a ancandilá-la
Yá boziou i todo
E nun l baliu de nada

A querer fugir
Sbarrou nun talabanco
Como ye qu´hei-de ir
Se stá todo tan branco

Yá zasperada
Tornou a boziar
Ah maizica amada
Beni-me a achar

Anté que pal chano
Mirou assustada
I alhá na niebe
Biu ua pisagada

Era de sue mai
Debrebe la coinciu
Corriu i seguiu-la
I si la çcubriu

Mas assí i todo
Eilha iba assustada
I la mai de percurar
Yá staba mui cansada

Cansada i anraibada
Cun la sue lhebrica
Que sien l dezir nada
L fugiu solica

La mai quedou feliç
Mas percurou-l assí:
Porquei fugiste
De l pie de mi?

Nun bés que nun puodes
Tu sola scapar
Agora stás de castigo
I bás-te a deitar

La lhebrica deitou-se
Fizo l que la mai mandou
I quedou mui triste
Porque nun brincou

Las amigas stában
Todas a jogar
A oubi-las dezie
Nun me torno a scapar

sexta-feira, 18 de dezembro de 2009

Flori

Flori an Dezembre
Ua flor descreta an
Florestas de çanceinho.

Flori an Dezembre
No praino branco i friu
Semiente de Abril.

terça-feira, 15 de dezembro de 2009

Tece un xál se seda

Cun golpes de palabras
Sinte l friu
De perdidos ne l zerto
Maribundos
An dunas ancarambinadas.
Heisita
Mete-se nun capulho
Porteige-se.
Refai-se
An metamorfoses
Sal
Anfrenta la nuite
Bai.
Abana l cuorpo
I la moreira
De que se alimenta.
Fortalcida
Nun smorece
I tece
Un xál de seda.
Amerosa…
Calece.

De la polagueira de l tiempo

Einamorou-se del na scuola, antre brincos ne ls recreios i zeinhos que l pedie para fazer, para amostrar a la porsora. Era ancapaç de fazer un risco eigual a l´outro.
Lie cumo se la liçon fusse de cor, cumo repetie la tabuada dals nuobe, screbie sien erros, nien un assento faltaba a ua bogal.
Fai-me le zeinho, pedie-l, sintado al sou lhado na carteira, nua mistura de ninos de quarta cun sigunda por modo de nun copiaren ls ditados i ls porblemas de cinco ou seis cuontas. Tenien que quedar porparados pala bida de labrador anstruído ou para iren pala Guarda Fiscal ou Republicana i que assi i todo, bien pouco anstruídos eran.
Ls de la quarta, tenen que star bien porparados, para poderen passar no eisame an Miranda, dezie-l la porsora ne l meio de puxones de oureilhas i lambadas.


Fai-me l zeinho!

An menos de un sfregante l zeinho salie no sou cadernico ou na piedra, cun pouca arte, nun fura la porsora aplicar la sue arte de dar reguadas, nas manicas daqueilha nina.
Amou-lo zde pequeinha, naquel amor de nina, de ua proua anfenita de star sintada al pie dun rapaç mais bielho que l daba atençon, mais atençon que a qualquiera outra nina, spigadota i acumparada a el cun sous doze anhos, el cun sue bragueta yá a medrar a las scundidas, birado pala touça.
Serás la mie tie, custe l que custar, dixo-le quando eilha tenie doze anhos i el desasseis. Eilha quelurou de einocéncia…


Tenes que arranjar un tiu rico, cun muita baca i muita tierra dezie-l sue mai, anquanto l staba a ansinar a fazer na meia. Nun bés cumo ye la bida, la nuossa bida; a trabalhar todo l anho i apuis toma alhá metade. Esse caseiro que angorda fresco, comendo i buendo l nuosso sudor.

Nunca mais miro para ti se nun salires desta pobreza, ne l altar de Nuossa Senhora!...
Tenes que te casar rica, Mariana; tu nun me andes cun boubadas, nun te pongas nas bocas de l mundo que apuis quien tenga algo de sou, nun te quier.


Essa malha bai andando siempre ua alantre, para que nun quede carreiron ne l sítio de las agulhas, siempre ua alantre, an todas las agulhas.

Bá, a ber se te çpachas para apuis te ansinar a fazer la taloeira, ls gorros de l carcanhal i ls minguados de la punta de l pie.
Apuis tenes que daprender l ponto de garbanço i ls trocidos palas camisolas, botar remendos i muita outra cousa que toda la mulhier que se cunsidere ten que saber, cumpensar la falta de tierras cun las tues pequeinhas artes, seres antrejeitada i saberes cuidar de l home que te lhebar i de ls filhos que te fazir.

Mariana, apuis que Carlos l habie dito que querie que fusse la sue tie, nun pansaba an mais nada, iba para dous anhos. Que eirie a ser de la sue bida se Carlos era pouco mais rico que eilha, siete armanos, ua junta de bacas, un burro, dous cerrados pequerricos, ua casica cun trés quarticos para sous pais i ls filhos todos.
Porquei serie sue mai tan arganeira!...
Ancuntrában-se adónde podien sien que naide soubira.

Apuis la mai soubo, hai siempre quien fale...
Mariana fugiu para casa del, de sous pais, la única maneira que ancuntrou. Apuis lhimpórun la palha a un palheirico i fúrun para alhá, naquel amor que benie zde ninos.

Sue mai nunca l dou licença para se casar.

Que habie de you fazer cun desasseis anhos cun l cuorpo i l alma a lhebáren-me siempre pala rue de l Gato, i mie mai a dá-me porrada, dezie-me eilha eiqui hai uns dies.
Pensas que algua beç me arrependi? Nunca, cun la graça de Dius.
Tomara-l you acá, Dius l tenga an buon lhugar…
Era bien guapo, ora era, percuraba-me a mi, chena de proua, al tiempo que miraba l retrato antigo que l dei, achado ne l meio de las mies recordaçones, arcas chenas de polagueira de l tiempo, daquel tiempo an que miu pai era moço.
Tu ye que mos fuste arranjando uns retratos quando trazies ua máquina de Miranda. Agora este!... Este ye tou pai,... todo acaba!...
Será que algua beç Carlos haberie bido este retrato??!!




L gato Farruscas

Le gato Farruscas
Ye un gato siamés
Anganha-se cun las pantufas
Calça-las d´alrobés

Ye mui branquito
Cun pelo pendado
A las bezes pón-l gel

Para andar lhebantado

Quando se assusta
Fai grande rebulhiço
Cun l pelo eiriçado
Parece un pelhiço

La mai de Martica
Un die dixo-l assi:
Trago-bos ua cumpanha
A ti i a Amélie

Bíben eilhes todos
Cun grande alegria
Respeito i amisade
An porfeita harmonia

Marta toca piano
Farruscas biola
Amélie canta
I beila eilha sola

Siempre leian un lhibro
Apuis de ciar
Porque todo mundo
Ten que studar

Jogan todos juntos
I bán a passear
Scríben no cumputador
Antes de se deitar

Apuis lhában ls dientes
Antes de ir pala cama
Dán un beisico
I dizen anté manhana

Nun tablado de l mundo

Sintada na cadeira, a sfregar las manos, miraba l´einfenito, mirar ousente, tablados de triatos antigos, pistas de beilados.
Delantre, la chábena de café cun lheite i l pan cun manteiga eigual a tantos outros dezeiunos.
Nunca gustou de quemer muito, a bien dezir nien la buntade l pedie. Mais ningua gana que nun fusse pisar bolando, cuorpo drubado cumo se ls uossos fússen tenrilhas, ls músclos fierro i al mesmo tiempo miadas de seda, drobada subre eilha mesma.
Apuis, bebiu un trago i mirou-me cun aqueilhes uolhos de quelor de abelhana na cena de Natal i apuis de angolhir dixo-me: Sabes, you fui beilarina muito anho; quando ls uossos yá stalhában un cibico, punírun outra rapaza nuoba no miu lhugar i you sien ls tablados, fui nuite sien streilhas. Apuis, inda ansinei muito anho; inda ansino agora quando quedo a mirar i, a mirar beilo nas puntas de ls pies, bestida cun bestidos rodados de ourgandi i calçada cun çabrinas.
Ne ls mius pensamientos eilhes, ls que stán eiqui sintados a dezeiunar-se, stan todos a beilar comigo l Lhago de ls Cisnes, an qualquiera tablado de l mundo.
Anté ls que se quédan nas cadeiras de ruodas alhá stan.
Mais un trago i ua mordiscada ne l pan, al modo de quien nun ten muita gana. Un maçcar debrebe para tornar a beilar anquanto falaba comigo, uolhos a parecéren streilhas.
You miraba para eilha a eimaginar cumo serie guapa i graciosa! Inda agora ye cun uitenta anhos. A pensar, eimaginei-me naqueilha eidade.
De repente uolhos assustados, lhágrimas cara abaixo...
Ye siempre assi,... outra beç! Çculpa. Que bergonha para ua beilarina...
Anda mie streilha, bén! Dá-me la mano que yá tornas lhabadica i perfumada para bolares para outro tablado, dixo-l la ampregada de la residéncia para eidosos. Seguiu cun passos anciertos i cun aqueilha maneira eilebada, de beilarina d´antiempos!
Sabes? A las bezes tomara de star cun la cabeça aboubalhada para nun antender las zgrácias de la bida mas apuis tamien penso l que serie bibir sien ls mius beilados i cun eilhes quiero quedar siempre, dixo-me eilha apuis que bolbiu.
Cuntinou a mirar i a beilar als sonidos de las ourquestras que quedórun para siempre grabados na sue alma, al mesmo tiempo que falaba.
Quedei a pensar i, cuido que, por muito que faga sufrir un sentir la amputéncia, siempre será melhor star an porfeito juízo.

Stou eilhi

Bén!


Dá-me la mano
Armano
Amigo
Quiero lhebá-te
Comigo.
Quiero
Que comigo mires
La parede de piedra
Arrimada
A barro burmeilho
Dóndio
Ua murailha tecida.


Cheira l mofo berde
Resfolga l aire
I berás an cada piedra
An cada gota
De la gelada derretida
Muito de mi.
Apuis
Chube las scaleiras…
Stou eilhi!


quinta-feira, 10 de dezembro de 2009

Soubo apuis


Fai fiestas a la bida na ánsia de quien nun quier lhargar la silba a la borda de l percepício, mesmo que deilhi sala toda picada.
Cun la angústia joga necras para que se ambaia i apuis que la bei ambaída, di-l que bán a jogar a las scundelinas i tanto que se esconde, l´angústia yá nun la acha..
Porque será que hai dies que nun ye perciso jogar a la scundelina, todo ye claro, todo ye berde- mar i azul-cielo; outros, por muita cera que se ponga na piel, muita auga de rosas se ponga nos uolhos, nada ye claro, ls uolhos stán mortiços, la piel nun relhuç.
Acabou de tener l terceiro filho que, por acauso era ua filha, la única, ua filha tan deseada. Todas las cundiçones para star feliç, mas porque nun staba?!!
Porquei nien gana tenie de lhabar aquel ser pequerrico, se aquel ser nun tenie culpa de la sue tristeza, de la sue dezolaçon. Querie agarrá-se a ua silba que la tirasse daquel percepício, ua nória que la sacásse daquel poço que yá habie anchido de lágrimas sien saber porquei. Ua tristeza permanente, die apuis die, nuite apuis nuite…
Estas cousas nun se falában, i eilha anté sintie bergonha i culpa, sientie-se mala mai, tan mala al ponto de nun querer tratar de la ninica.
Amanhou fuorças, ls dies fúrun passando, ls filhos percisában cada beç mais i mesmo sien garabato ó nória, fui salindo de l poço fondo, sien ajuda de ningua pírula.
Anhos apuis soube que afinal mala mai nunca habie sido. La depreçón apuis parto ye quemun nas ties apuis que pairen ls filhos, anque nun seia siempre assi, an todos ls partos.
Ne l percípio de la grabideç hai ua chubida mui grande de hourmonas, lhougo que l parto se dá, essa grande quantidade deç de repente i todo l´eiquelíbrio físico i de cabeça se sbarrulha nun sfregante, necitando na maior parte de las bezes de ajuda médica.

L cuorpo dou-l seinhas, eilha ye que nun las antandiu...

Hai uns anhos


Hai uns anhos no Natal
Era l Nino Jasus solico
Que an beç de l Pai Natal
Ponie cousas no çapatico

Ls ninos deixában ls çapatos
De nuite anriba ls chupones
Apuis el deixaba figos
I a las bezes teçtones

Apuis la missa de l Galho
Iba-los lhougo a poner
Nas casas de to ls ninos
Que fazien pul merecer

Na manhana de Natal
Lhougo a la purmanhanica
Lhebantában-se mui cedo
A saber de la prendica

L nino Jasus cansaba-se
Porque era pequerrico
Agora ben l Pai Natal
Anriba de sou carrico

La monica Amélie


Martica ye ua nina
Que ten ua mona
Que se chama Amélie.
Ye guapa i fina
Cun uolhos azules
Cumo you nunca bi.

Quando Marquita
Fui pa la scuola
Deixou la monica
An casa, eilha sola.

Antes de salir
Dixo-le assi:
Quedas a jogar
Para te ambair
Que apuis
Torno para ti.

La monica jogou
Mas yá staba cansada
I fizo zeinhos
Anquanto speraba.

Quando Marta chegou
Fui-la lhougo a ber
I trouxe-le un lhibro
Pa l'ansinar a ler.

Apuis dixo-le:
L saber
Ten muito balor
Ben acá
Que te bou a ansinar
A outelizar
L cumputador

sábado, 5 de dezembro de 2009

La reboluçon

Fui par'ende hai uns dies
Que se dou l rebulhiço
La chouriça yá de pies
Precurou al sou chouriço

Sendo tu l home de casa
Bás a tomar atençon
Nien cozida, nien na brasa
Sien saber por que rezon

La rezon que me dezírun
Ye ampuosta puls doutores
L colestrol que medírun
Cun fumeiro chubiu balores

A queixá-se de la suorte
Drento de l cungelador
L botielho stá a la muorte
De tener tanto balhor

Dizie el, poucos me cómen
Nien cousa para anfariar
I l´auga cun que me cuozen
Bán-la lhougo a arramar

I dalhá de drento de l´arca
Lhebantou-se anraibado
Hai que fundar sindicato
Senó stá todo amolado

Isso mesmo diç la bocha
Lhebantou l braço rancioso
Bamos alhá a associar-mos
Que isto stá mui custoso

Un chabiano solico
Alhebantou-se zgustoso
A mi yá naide me fai
I you era tan apetitoso

La tabafeia saliu
I fizo grande alboroto
Podeis ir a botaçones
Mas nun lhebais l miu boto

Como an todo neste mundo
Hai çfrentes oupeniones
Ye quemida todo l´anho
I nun quier reboluçones

Ancolhido que nien rato
Respundiu l turrelhon
You que solo sou pa l gato
Stou cun bós an ounion

L costelhal na parede
Que staba alhá secar
Mirai nun báiades sien mi
Que tamien quiero botar

Dues oureilhas cul çufino
Más ua pata ambejosa
Ajuntan-se al toucino
I la morcielha gulosa

Apuis tomou la palabra
L chabiano, un farol
Mas que cousa ye essa?
Todos acontra l colestrol!!!

quinta-feira, 3 de dezembro de 2009

Quiero amostrá-te...

Tu que tenes augas de quelores de cielo, de berde, de azul cobalto ou ua mistura de azul celeste i indigo.
Tu que tenes barcos, gente a sonhar an cruzeiros, mulhieres que choran ls filhos que an ti se afundórun anquanto acaçában peixes an redes de nuolos, tantos nuolos cumo ls que se tecírun nas sues bidas.
Tu que tenes charrascas , tu que tenes poder tamanho, tu que tenes sereias a anfeiteçar marinheiros e angulhes apuis de perdidos, tu que tenes gaibotas an mastros perdidos. Tu que tenes todo, cumo tu te eiludes se assi pensas!...

Deixa-me que te mostre amigo, ua tierra que nun te tenendo, surbiu l tou azul atrabeç de l cielo i l tou berde atrabeç de ls montes i de las prainuras.
I amostro-te l cielo strelhado a la nuite, de l mais puro cobalto, cun la lhuna miruolha a begiar las custelhaçones i las streilhas, nun baien eilhas a anfunisgar-se por qualquiera galaton dun planeta perdido, deseoso de lhuç i las lhiebe.
Agora bás a calhá-te, acabar cun ls tous roncos, nun baias a assustar ls ranucalhos que cantan nas lhagonas i nos charcos quaije que secos. Oube, nun lhebantes óndias, queda-te an silénço, ua nuite que seia, la nuite de l tou sossego i oube tamien ls grilhos a cantar que sperórun zanquietos que las checharras se calhássen, para nun l stragar la sue melodie dals dies calientes, cumpanhas de segadores que tamien cantan, anquanto de quadriles drobados puxan las fouces para cortar ls trigales cun sous marfolhos de torna cerrada.
Quiero amostrá-te las óndias, óndias pacíficas, adonde nun se afogan marinheiros, óndias de beilado an riba dals çantenos, daqueilhas de las senaras de la mie nineç i que de tan berdes apuis se buolben ouro, se sécan, deixan de ondiar i apuis matan la fome a ninos.
Mira ls ninos que de tan pequerricos nun se beian antre ls chougarços quando bán a ser buieiros.
Quiero amostrá-te todo deste praino, aquel que de que you te falo quando tengo saudades de la sue quietude, de las sues óndias i te besito para ber las tues i l tou praino berde que eimagino cumo sendo çanteno.
Quiero amostrá-te...

quarta-feira, 2 de dezembro de 2009

Eras, eras, cundanida!...

Inda se al menos tebísses salido rapaç, siempre me daries menos cubradeiros de cabeça.
El hai cousas, pensaba you quando pequerrica, se you gustaba tanto de ser assí nina que siempre brincaba cun flores, de morada, fazie monas de farrapos i todo quanto ls garotos fazien cumo tal chubir a las árboles, atirar lapadas i fazé-las fungar, apanhar paixaros, armar lousones, todico.
Al menos you ancuntraba bantaige an ser nina. Ls rapazes se fússen apanhados a mexer nas monas ou flores que fusse dezien-l lhougo que se l caie la cousica i a mie naide me dezie que me medraba algua cousica quando atiraba lapadas ou jogaba cuns rapazes.
Carai, mas aqueilha frase que oubi mais que ua beç, martelhaba-me la cabecica…
Las proibiçones de fazer isto i aquilo chegórun mais tarde i ende bi l alcance de la cousa, al ponto de muita beç haber deseado que se habisse cumprido l deseio de mie mãe.
Que tiempo aquel que todo era pribido a las rapazas i tamien muita cousa a las mulhieres.
Essa fase passou i ancontro que mesmo sabendo que nós mulhieres somos mais sacreficadas, you prefiro, por muitas rezones i mais alguas, ser mulhier de que ser home.
Cousas mies i cada un ye libre de sentir…
L´outurdie perguntei-l a mie mãe, porquei dessa pantemina que dezien.
Tu nun bês, als homes nun se l pega nada, dán-l ua sacudidela i pronto!
Agora yá nun ye assí mãe, si se l apega… Po si, mas nun ye nesse santido que you falo.
I apuis sabes, gostaba que fusses barrista cumo tou pai.
Ah mãe, you se tebísse salido rapaç era caçador an África, cumo miu pai, na cierta.
Ah eras, eras, cundanida!...

Arranca-me

Arranca-me
Bai!
Arranca-me la lágrima de l peito
Antes que cristalize an ancenso
I cun el me queime
I me perda ne l scuro
Adonde me deito.
Passeia pula mie rue
Campanina de l miu cuorpo
Nesta nuite de carambelo
Lhagona ampedernida
Adonde nien pinga
A scorrer, nien sunriso
Ó ai.
Bai!
Arranca-me un querer
Deste mar d'andefrença
Adonde me drumo.
Agita-me las augas
Lhebanta-me las óndias
Atinge-me las frinchas
Parte ls glaciares
De ls mius uolhos
Neste mundo sien streilhas...

Arquivo do blogue