Moçambique

Moçambique
Parque da Gorongosa

Douro

Douro
An cama de mofo

sexta-feira, 13 de fevereiro de 2009

L diê qu´amansiemos la baca braba- Stórias de tie Purdência VII



Tie Purdência eiqui inda era nuoba. Mas ianche nuobos, eilha i tiu Felismiano bíran-se mui mal para amansiar ua baca que mais parecie l diabo. Antón deixo-bos cun tie Purdéncia que bos cuntará la stória, cum´eilha sabe:

"Mirai, aquilo era l diabo an figura de baca!...
Essa baca nien sei cumo nun mos matou a mi, al miu i ls nuossos ninos.
Quando la fumos a ounhir la purmeira beç, pa la lhebar a arar, iá you tenie ounhido la Cordeira qu´era mi mansica, anquanto speraba que Felismiano trazisse la Rola. Quando la trazie de la loija agarrada pu ls cuornos, dou un rudion i puso-se nas putas, a scatrapulhar a dreitos a las eiras.
Tube que you quedar de planton a sigurar l jugo i cun la curnal d´eilha a spera.
Felismiano fui-se atrás a correr que nien un tonto, porque se la deixássamos cun la d´eilha, nunca mais le puderiemos botar la mano. Deili a un cachico alhá la truixo i nun tardou muito porque la birórun a las eiras.
Todo mundo yá sabie la puta qu´ eilha era.
Apuis de l poner l arado cun la rabela an riba de l jugo, fumos pa la lhata. Felismiano nien sequiera ye un home nerboso, mas aquel die anrezinou-se muito i you anton fiquei que nien un brasalisco.
Caralcho, stube mesmo anraibada i anté cun miedo de la baca!...
Pon-te tu delantre cun la guelhada i dá-le cun fuorça no çufino, nun la deixes fujir; you puxo le la cuorda de l´oureilha i anterro le bien la reilha na tierra, qu´eilha há-de se cansar.
I el gboziaba! Dá-le no çufino carraaaalho!
Dezie-le you, se te fudisses!... Inde quieres que le deia mais?
Çcunfio qu´ inda me ban a apatulhar! Isto ye l puro diabo!...
Anda que you lhougo te le dixe quando la cumpreste inda bitela que tenie mala catadura! Tenie ls uolhos mi arremilados!...
Carrega tu bien no arado para ber se se cansa este berdugo! Carrega-le mais, foooda-se, qu´eilha inda pisa an riba de mi!...
Oulhai, çculpai por bos cuntar cun pragas, mas isto inda nun ye nada pal que fui naquel die.
Andebimos naquilo mais que tiempo, para un lhado i par´outro, a fazer sucos tuortos i fondos que nien galatones. Porende quatro horas.
Botemos mais pragas que sucos fazimos!...
Yá bedes qu´ agora nun fui nada asparcido cun aquel die. Anté Poulino que Dius tenga, mos boziou de la sue baranda: Hoije si anroseirais todas las qu´hai!...Eilha ye braba, mas se nun quedar amansiada, nun ye por faltas de pragas!...
Fiquemos tan cansadicos!... You si tenie bien pena de la Cordeira; cuitadica, si puxou bien para sigurar l´outra!
Nós só nun la tiremos delantre porque parie mi buonos bitelos i era mui buona criadeira.
Bós nun manjinais l que ye de perigoso!...
Se a causo se déixan fujir las bacas cun l arado, cégan-se a fugir i quanto mais fuogen mais s´anréilhan i quanto mais se firen mais fuojen i só páran se l arado se le prendir an algun fincon ou guiço. You inda dou fé d´ua junta de bacas de Zé de las Eiras que apuis de las picar las  abiespuras, fugírun de la arada i só parórun quando  l arado se prandiu nun fincon i se partiu an dous, ficando alhá la rabela. Ficóran nun San Lázaro a botar sangre de las patas de trás, i apuis alhá tornórun para casa cun l timon a la rastra.
Quedórun mancas mais que tiempo! Tenien que las lhebar al tronco para le zanfatar las feridas cun criulina. Puoden mesmo quedar anutelizadas!...

I fui assi nesse die.
A bien dezir, eilha quaixe que sienpre dou muita cangoixa; ye tanto que nós nun la puniemos quaije nunca al carro. Nun bedes, se ua junta de bacas, se bota a scatrapulhar cun l carro, nun pára anté que nun se spartice todo, habendo inda l peligro d´apatulhar gente que las querga fazer parar. Cégan-se a correr!...
Quereis que bos diga, bien trabalhos se passa nesta bida para nada tenermos!!!..."
 

9 comentários:

faustino.antao disse...

Oulá Adelaide

Quedei cuntento quando ancuntrei ls buossos sítios (blogues), cumo nun puodie deixar de ser, puis ye siempre ua grande alegrie ber i ler subre pessonas de la mie tierra (Zenízio)
i na mie lhéngua que ye l mirandés.
De l mesmo modo ber retratos de cousas i de mius amigos i sacalha parientes, puis tengo alguns na Speciosa.
You sou Faustino Antão, subrino de tiu Vitorino Raposo (yá falecido) i tengo muita stima pulas gientes d'alhá.
Agora que sei de bós pormeto ser un besitante i lheitor de todos ls buossos trabalhos.
Cumo deziedes , lhougo ne l ampeço deste blogue subre la algua cousa que stubisse menos cunfurme culas reglas de la scrita, you digo-bos adonde podeis ber la Cumbençon Outografica de la lhéngua Mirandesa i ende si ber l modo mais cierto.
www.nialdelaboubielha.org i an http://frolesmirandesas.blogspot.com

Saludos i anté lhougo
Faustino Antão

Adelaide Monteiro disse...

Oulá Foustino:
Dius mos deia buonas tardes!
Dius bos pague l buosso cumantario i ls sítios que m´indiquestes. Quando tebir bagar iá bou alhá.
Quedei cuntenta por saber que sodes subrino de tiu Bitorino. you lembro-me bien d´él. Se reparardes no retrato que ten muita gente i que ie a cores, stá alhá el; ten un chapéu na cabeça i stá d l lhado esquierdo d l retrato.
A mi pareciu-me el.Primeiro inda se m´asparciu a miu abô Abelino que era ferreiro i qu´iba muita beç a Zenízio a aguçar reilhas i fui el qu´ansinou a Tibério l oufício. Se calhar bós inda l cunhecistes.

Besitas miês para bós i que tengades saúde.

Adelaide

Adelaide Monteiro disse...

Foustino:
Con la priessa nun dixe todo. Staba you a dezir de miu abó; apuis bi que nun era el i lembra-me que serie buosso tiu.
Antá outor diê.
Adelaide

Associaçon Cultural i Recreatiba Nial de la Boubielha disse...

Dius mos deia buonas tardes Adelaide

Se hai cousas buonas n’Anternete, esta ye ua deilhas, acurtiar çtáncias i arrimar tiempo, i esto cun bós cuido que fui l causo, bonda ber que apuis de saber que sou subrino de tiu Bitorino, lhougo ls retratos sacados bien tiempo datrás yá son oujeto dua mirada para muitos anhos dantes.

Mas cumo deziedes l tiu que stá de chápeu a la squierda (cuido que ye l retrato adonde stán quemendo la merenda, cun garrafones i la manta ne l chano) nun se m’asparece a ser miu tiu. Quien bir hoije l miu primo Silbério, (mais bielho que you, (you naci an 25/7/1949) este miu primo que se casou cua tie de Samartino, ye la cara chapada de l pai, i nesse retrato you nun coinheço mais naide, stando mais giente alhá era supuosto star mais alguien an quien la cara deia seinhas de ser de la família.
Ne l retrato adonde stan muitos tius i ties, arrimados als uolmos, you coinheci muitas caras, nun sei ye dezir l nomes, cuido que alhá stá tiu Sebastian, i l pai de Raul (casado cun tie Sebastiana) armano de Outábio (estes conheço bien de quien sou amigo).
You nun me lhembro de ls nomes porque me sacapei de Zenízio cun 16 anhos, nun tenie pelo malo na cara, nien muita spriéncia de bida que ye quien fai calho

La cumbersa yá bai bien adelantrada, mas çculpai que inda querie fazer-bos un cumbite i dar-bos ua ambora.
La ambora ye que yá ajuntei ls buossos Blogues als demais que stan ne l site de l’Associaçon (na Lhigaçones/linkes, aldés de Miranda). L cumbite ye que gustaba de tener la buossa colaboraçon ne l “Site de la Boubielha”, puis ye belhingue (Pertués i Mirandês) cun cuontas, lhiendas, testos todo l que anriqueça la nuossa cultura d’associatibisbo, de la region i de la nuossa lhéngua. Las cuontas que publiquestes ne l buosso blogue son dua grande riqueza, la buossa mano pa la scrita eicelente i l mirandés ende screbido cul tiempo queda culas reglas de la Cumbençon Outográfica.
Bond ambiar para associacon@nialdelaboubielha.org ou faustino.antao@gmail.com .
You cunfesso-me, que siempre lhuitei para que la nuossa Associaçon Cultural i Recreatiba Nial de la Boubielha (Lisboua i alredores) tubisse mais giente de la Speciosa, de ls cien associados que somos, son poucos d’alhá.

(Un die inda falamos de cursos i de l ansino de l mirandés)

Mais ua beç las mies çculpas de bos consumir tanto

Besitas
Faustino Antão

Adelaide Monteiro disse...

EI!
Inda bien que screbistes tanto i tan bien!
Agradeço- bos l cumbite para you mandar cuontas d´alhá. Quando pudir iá las fago i las mando.
You num sabie dessa Associaçon; isso ie bien que haba, sim mais amboras.
Besitas
Adelaide
Quanto ls retratos you digo l de ls uolmos, mas secalhar nun ie.
N l retrato de la merenda stá miu abó Abelino, miu pai, i tiu Ourácio i apuis ie mi abó Ana, tie Calmantina (la questureira)i tie Flurantina.
Bós sodes d l mesmo anho que you, que naci an 16 de Maio de 49.
Bonda, tengo que me ir

Adelaide Monteiro disse...

Hei, outra beç:
Quedou todo misturado, só agora iê que bi!Teneis que l ler dl rubés!
Só quiero acreçantar que la mae de Raul era tie Benigna i stá no retrato. La tie de Raul iê Sabastiana.

Que tengades buon die

Adelaide

AF disse...

Buonas nuites Adelaide,

Fui cun ua grande eimoçon que besitei ls tous blogues, dambos a dous. I la eimoçon nun me deixa dezir mais nada, por hoije. Queda solo eiqui un guapíssemo poema, assinado por Adelaide Monteiro i que you pus na lhéngua de Dlaide:

You tube un pai
Caçador an África
Que tenie l coraçon
De la grandura de l mundo.
A cuntar cuontas de çafaris
Slubiou-se-me de la mano
I bolou!...
L campo stá baziu
Nesta mano sámbana
Que nun sou capaç de cerrar.
Perdona-me Dius,
Porque me roubeste?
You tube un pai
Que amou
I me ansinou a amar África...

Bien haias Adelaide / Dlaide, por todo l que mos oufereces.
Tornarei siempre.

L tou blogue passa zde agora a tener ua punta an
http://frolesmirandesas.blogspot.com

Amadeu Ferreira

Adelaide Monteiro disse...

Buonos dies, Amadeu,
Que cuntentica quedei cun la tue besita!... Cuntenta i honrada!
Sabes, you solo ampeçei agora a screber Mirandes i inda dou muitos erros.Cun l tiempo háde ir.
Parece que stou a tornar a nina, na mie scolica!...
Dius te l pague, por todo.

Beisos,

Adelaide

Amadeu disse...

Hounrado quedei you. Hoije screbi nun de ls mius blogues [ http://mwl.fracisconiebro.wordpress.com/ ] l seguinte:


Nuobas streilas

hai dies an que çcubro un nuobo blogue an mirandés: la eimoçon ye siempre mais fuorte que çcubrir ua nuoba streilha ne l cielo: stá tan acerca que le puodo boziar pul cumputador i lougo quedo cun jolda.


Beisos,
Amadeu

PS - Se le quejires botar ua mirada al miu blogue mais antigo, bai a http://lhengua.blogspot.com

Enviar um comentário

Arquivo do blogue