Moçambique

Moçambique
Parque da Gorongosa

Douro

Douro
An cama de mofo

sábado, 25 de abril de 2009

Tornarei a lhuitar


Camino nas nubres
Cun pies çcalços
An fugida zatinada
I tengo miedo de me caier.
Camino na niebe dóndia i frie
Colada als mius pies atrecidos
I tengo miedo de me afundir.
Las mies manos témbran
Ls mius pies sgúbian-se
I falta-me la coraige
Para cuntinar.
Atrabesso rius secos
Cun miedo de me afogar.
Ansegura, chubo muntanhas
Cun miedo de me zourientar.

Adonde stou, percuro-me…
L que restra de la mie coraige
I porquei nun seguir biaije?

Por sfregantes
Las mies augas son arrepassadas
Por corrientes de cunflitos
Las mies pérolas son roubadas
De conchas bioladas.
Airaçadas rómpen
Las belas de l miu beleiro
I you, perdida
Pido ajuda a las gaibotas
I al albatroç
Para que me póngan ne l camino
I me lhieben
Esta grima atroç.

Ah! Esta grima…
Este miedo que me ancarambina l sangre
Tuolhe-me ls passos
Cuntrola-me ls miolhos
I nun me deixa cuntinar

….Mas manhana ye outro die!...
An mi, l sol tornará a relhampar
I you, resolbida,
Cuntenta, firme, renacida,
Tornarei a lhuitar!

4 comentários:

Almendra disse...

Gustei de ler i quedo cuntento por ber ua tie mirandesa usar cumo naide las palabras que solo nós, mirandeses, antendemos i coincemos.
Parabienes!
Almendra

Adelaide Monteiro disse...

Oubrigada, Almendra.
Usamos-las todos nós, cada un a sou modo i hemos de usar cada beç mais, para eilebar la nuossa lhéngua i la nuossa cultura.
Beisicos
Adelaide

isilda.nascimento disse...

Oula amiga Adelaide!
Ye un prazer ler ls sous poemas mas cumo todo l que faç ye guapo, nao serie de admirar!
Parabienes mie amiga por todo l que ne ls oufrece tao dignamente na nuossa lhengua mirandesa.
Adoro todo aqueilho que scribe.
Beisicos
Eisilda

Adelaide Monteiro disse...

Isilda,
Bamos todos fazendo un cachico, uns dua maneira outros doutra. Ye un manancial de cousas que ban aparecendo.
Beisicos Eisilda,
Delaide

Enviar um comentário

Arquivo do blogue