Moçambique

Moçambique
Parque da Gorongosa

Douro

Douro
An cama de mofo

sexta-feira, 9 de outubro de 2009

L Scapulairo


Ye mui atreita a chiçpas, dezie-se…
Assi era. Muita beç la fúrun a buscar al cerrado ou a qualquiera outro sítio de l termo cumo se stubíra muorta apuis de algua chiçpa l cair al pie. Nien andar cun l trubisco l balie i la ouraçón a Santa Bárbela, tampouco.
Quedaba loinge dals freixos, nun se arrimaba a ningun silbeirón que fusse, çque houbie l pormeiro atrono, cun la trebuada a rundar inda quiaijeque an San Martino.

Eilha nien logra saúde, parece un cacaforro. Aposto que ten sido de l´eifeito de las chisçpas que l han caído mui acerca deilha, dezie la gente. Cuitada de mulhier, nien las ouraçones a Santa Bálbela l tenan balido, arrematában!...


Seia l que fur, nunca facelitando, dizie mie abó Ana, hai que fazer algo. L que serie se eilha nun rezasse a Santa Bárbela i nun trazisse cun eilha ls ramos de trobisco; a la cierta ya ua l tenerie abierto la cabeça, cuitada,... balha-mos Dius.

I fui por querer fazer algo para fastar las chiçpas, cumo se fura un apara raios que mie abó Ana me prandiu cun ua çigurança, por drento na camisica, ua bulsica cun algo benzido drento, a que chamaba l scapulário. Quando mudaba la camisica, alhá tornaba a spetar na lhabada, la bolsica branca.
Si, mie nina, para que steias portejida de todos ls peligros, dezie –me.

A el mos agarremos todos cierta tarde na scuola.
Fiç-se scuro de repente. La lhuç que mos chegaba atrabeç de las jinelas era la de ls relhistros; eimediatamente a seguir oubien-se ls atronos que mos gelaban l sangre que corrie nas benas streiticas de ninos.
Eili quedórun todos, cumo se fussen spigas nua garanheira, a ruoda de mi i del scapulário…
Nun sfregante, ua lhuç cegou-mos, un stalhido anxurdou-mos i un cheiro a queimado atafanhou-mos.
A la ruoda de l scapulairo, sentimos un aperto nos coraçonicos que batien que nien l de ls paixaricos quando són tirados de l nial.
Ui cuitada de tie Marie da Cruç, boziemos, quando bimos aquel feixe de lhuç a antrar an sue casa, ua casa baixica adelantre de la scuola.
Corrimos para alhá, nun se me lembra se naquel sfregante, se un cachico apuis.

Staban a merandar, ls dous. Quedórun brancos que nien la cera de l´eigreija. A tie Marie da Cruç custába-l a resfuolgar.
Benie a dreitos a eilha la chiçpa, dezie la gente i nós tamien, inda todos junticos por bias de l miedo que benisse outra.

Lembra-se-me mui bien que pula parede abaixo a dreitos a eilhes habie l riscadeiro branco na parede negra de fulhin. Apuis an cierto sítio habie un saco de lhana colgado na parede i ende birou i spetou-se ne l chano de la casa, de la casa terreira cun chano de tierra.

Tie Marie da Cruç, morriu-se doutra cousa qualquiera, nun die sien treboada, mas la gente inda hoije diç quando deilha se fala: you tengo para mi que las chiçpas fúrun la causa de eilha nunca lograr saúde.

La mesica adónde eilhes stában a merandar tengo-la you que me la dou l sou sobrino, sabendo que you gusto de cousas antigas i cun stória.

Bien haias, Antonho.

4 comentários:

Balmiro disse...

Ler de bos ye ua terapia Adelaide. Parece que s'anda pol menos 40 anos dal-robes y num sfregante! Y que se torna al tiempo dal tiu Agrepino y de la ti Marie da Cruc.. y dals trubiscos y scapularios para spantar las chispas de las troboadas. Y de Santa Barbela tamien puis claro. La nussa furmula maigica era:

Santa Barbela bandita
que no cielo sta scrita
cum ?? (ya num m'amembra) y auga benta
libraimos desta tormenta.

Que Santa Barbela bos guarde.

Adelaide Monteiro disse...

Santa Bárbela bendita
que no cielo stá scrita
cun papel i auga benta
librai-mos desta tormenta

Santa Bárbela se bestiu i se calçou
a Jasus Cristo ancuntrou
i Jasus Cristo l percurou:
adonde bás á Balbela?
you nun bou nien quiero ir
solo al cielo quiero chubir
derramar la treboada
que no cielo anda arranjada.
Bai, Bárbela bai
que ancuntrarás.....(nun se me lembra)
....nien pan
i nun tenan mais que l dar
que l´auga de trobón.



Nun se me lembra todo.

Balmiro disse...

Oubrigado Adelaide - quien sabe sabe! You numca tube grande geito para las rezas y de pouco me baliram als anhos de seminario.

Quando fize la primeira quemenhon, no di antes furan las cunfissones y lhougo a seguir juntei-me cum dous ou tres a la salida de la eigreija, na moreira. Para qui que mos habi de dar? Para ir a las cereijas de Ze Abilio!

Habi poucas cereijas na Speciosa y Ze Ablio teni ua cereijeira mi guapa y carregadica de cereijas daqueillas brancas eili na caleija de su casa, caras a la de tiu Alfredo.
Estaba you alha ancarrapitado anriba aparece el. Als outros desandoram lhougo cada um para sou lhado como perdigones mas you como estaba inda anriba apanhou-me.

Lhebou-me para casa agarrado por ua oureilha y you cumo num iba nada cuntente daba lhargas a todo al miu bocabulario... En casa estaba ti Nocencia al redor dal lhume y tube dreito a ua sigunda cunfisson. Eilha ate que fui mi cumprehansiba, l pior nim squira eram las cereijas mas tener sido lhougo a seguir a la cunfisson para la primeira quemenhon. Nunca se teni bisto tamanha heiresia!

Mas bom acho qu'al als padres y al mundo damos penitencias que chegue pa las cereijas - mesmo las brancas de Ze Abilio!

Todo de buono.

Adelaide Monteiro disse...

Que si me faziste rir!...
Sós cumo tue mãe, cun muito sentido de houmor.
Beisos

Enviar um comentário

Arquivo do blogue