Moçambique

Moçambique
Parque da Gorongosa

Douro

Douro
An cama de mofo

terça-feira, 16 de novembro de 2010

Stá tan guapo l Praino!


Salido ne l Jornal Nordeste de die desasseis de Nobembre.


Quando miro pulas jinelas, ye un mundo de quelor que se m’apersenta i me cumbida a caminar por esse termo. Ye ua altura de l anho guapíssema, esta de l´Outonho, neste cair de fuolhas, apuis que las arbles realizórun sous suonhos dastanho. Mais suonhos chegaran cun la Primabera i assi se seguirá l camino nua renobaçon sien fin.
La yerba medrou, cortou la sequidade i anchiu-le la barriga a la cria i ls rocos fúrun salindo, apuis de las purmeiras augas. Al alrobés, las árbles fúrun perdendo l berde i, cumo cun pena de deixar a sue mai, fúrun-se matizando de burmeilho i amarielho, cada beç mais andebles, anté que un die de maior eiraçada bolaran i an xaragones passaran l Eimbierno.
Yá haberá ua manada buona de anhos que nun besitaba l Praino neste meio de Nobembre, este tiempo an que l termo ten las quelores de la paleta cun que pinto, la paleta de las quelores de l Outonho. Cumo un se sinte pequeinho cun este arrebento de quelores de la natureza!
Chubi a un punto de l Sierro, d’adonde se béien alredror bistas quaijeque sien fin i, al ber tanta belheza, chubiu-me ua eimoçon anrebulhada an nostalgie, tan grande que las lhágrimas se me sgubiórun cara abaixo. Alhá me quedei sintada nua cantarie an pie ls panes. I you que pensaba que nun acharie yá panes! Ende stában, nua berdura rala a deixáren ber la tierra burmeilha, las folhicas de l trigo cun priessa de se fortalcéren para nun se tumbáren cun la gilada i l çanceinho.
Ls carbalhos de las plantaçones que éran fuogo bai para quinze dies, agora son dun castanho fuorte. Ls carbalhos i touças quieren-le ganhar als castanheiros an belheza, mas nun son capazes, eilhes nun ls déixan i, a la par de las fuolhas, cuntínan a deixar que ls pelhiços se báian abrindo i las castanhas relhamposas pínguen ne l chano. Ls freixos de cerrados mais abaixo yá stan çpidicos dando ua quelor acastanhada als cerrados, anquanto ls ciedros i pinhos se manténen siempre berdes, seia qual fur la altura de l anho. Cun sous berdes bibos i secos son fuolhas deste manhuço de flores amarielhas i burmeilhas cun que se cubre l termo.
Hai ua serenidade outunhal anfenita an toda la natureza, la mesma de mulhier cun filhos criados, arrolhando ls nietos cun toda la sabedoria dua bida.
Outonho ye doçura an fuolhas que se çprénden i póusan an rugaços calientes, doces bércios.

Adelaide Monteiro



8 comentários:

Isilda disse...

Bounas tardes Delaidica!

Alha stás tu, marabilhada cun la beleza que se pude dislhumbrar nesta eipoca d'Outonho! Ye berdade, quando stube aí, puls Santos, quedei ancantada cun tanta quelor que la natureza mos ofrece. Este anho l Praino staba guapissimo, pintado de todas las quelores. Las arbres inda staban chenas de fuolhas, de quelores castanhas e amarilhas nels sous dibersos tons.
Y anton ber esas quelores todas, nun die de muito sol, deixamos ls uolhos y l'alma chenos.
Tamien la nostalgia y la saudade de tiempos que passórun mos tocan l nuosso grande coraçon.

Beisicos amiga.

Isilda

Adelaide Monteiro disse...

Cun ls anhos, daprendemos a balorizar mais las cousas.

Beisicos Eisildica.


Delaide

Anónimo disse...

Delaide
Ya sabê dls tous dots darte.Çqubri agora tous dots de posia en Mirandês. Quando bod para Picote e passo en Nazo beio la placa Speciosa e demodes que lhembro-me lhougo de Delaide. Quedei mui cunteto por tu entrebista en "Nordeste" Sos uña rapaza mui balente. Cuntinua que bas mui bien.
Beiso pra ti e rezones pra Manuel

Edguardo Domingues

Adelaide Monteiro disse...

Á nino!

Que buntade tengo de te dar un abraço arrochado!

Bá, passando l Naso, abaixa un cachico i bai-mos a ber; se bien calha stamos alhá, ye ua queston de percurares.

Beisicos i até qualquiera die.

Delaide

Balmiro Quinteiro disse...

Oubrigado Adelaide. Hai quien diga que la beleza ye tamien um reflexo de l'alma...

Agora debe star bien fresquito l Plaino!

Bjs,
Belmiro

Adelaide Monteiro disse...

Claro que si Belmiro. Para achar beleza nas cousas tenemos que las sentir arriba de todo, tén tamien que mos salir bien star na alma, para apuis la beleza mos antrar i mos fazer bibrar.

beisico

Eduardo Domingues disse...

Delaide
Inda agora recebi l libro que faziste l fabor de me ofarcer "Antre Monas I Sbolácios". Deborei-lo mas inda num l acabei. Falta pouco. Stou marabilhado.Aqueilha "LA RAPAZICA SPECIOSANA" stá bien retratada...fantástica. Todos ls Mirandeses quierem que cuntinues.
Quedei mui feliç cum la tu dedicatória. Mui agradecido.
Beisicos e abraços.

Adelaide Monteiro disse...

Carai Eiduardico! Nun habie bido l tou quementairo!
Bien haias pula fuorça i por seres mui amigo, tu que siempre fuste para mi ua referéncia an serenidade.
Quier dezir anton que l nuosso amigo Salbador anda porende! Esse rapaç tamien ye outro que tengo drento de l peito.
You acabei por nun ir. A la última acabemos por treminar quedar-mos porqui.

Bá anton, cuntina la leitura dun pouco ó muito de mi.

Beisicos i bun anho de 2011.

Enviar um comentário

Arquivo do blogue