Moçambique

Moçambique
Parque da Gorongosa

Douro

Douro
An cama de mofo

sexta-feira, 20 de fevereiro de 2009

Quando...









Quando…

te oubo, squilica de baca, de sonidos lebes quando paçes, de sonidos mais fuortes i agudos quando debrebe biras la cabeça para anxotar cun fuorça un atabano que te picou no lhombo, pon se me ua eimuçon tamanha!...


Quando...

nun t´oubo, sinfonia de carros de bacas no acarreio, dá-me ua soudade tan aguda!...

Quando...

iá nun te beio, pitica de Dius, a cuntar me ls dedos i bular para Dius, fico de lhuito!...Bisto la mi alma de negro cerrado, sento me debaixo dua maçaneira doliente, chena de marrenega cumo todas stan, quedo cun nuolos no peito i no coraçon, que tengo que te buziar: pitica de Dius, ben para mi, ben mius dedos cuntar!...A las bezes ben, outras não!...


You eimajino i fago de cuonta que ben!...Burmelhica, legeira, cun pintas negras...

Quando paraba
i anquanto nun bolaba
i ls dedos cuntaba,
i nun paraba:
Por esse sfergante, de berdade,
antraba l´eiternidade!...

You eimagino las squilicas an todo l lhado, cumo que arrespunder, uas a outras...

You cerro ls uolhos de la cara i abro ls de l´alma i eimagino que oubo l´ourquestra afinada, a camino de las eiras. Sunidos grabes i mais agudos, mas afinada...

Quando...

iá nun ancontro, por star cheno de silbeirones i chougarços,... l carreiron de nina que me cunduzie a un campo de sharas i temielhos para me poner cheirosa, sinto ua nostalgia tamanha!...
Sento-me nun fincon de ua parede sbarrulhda para çcansar las piernas que iá perdiran la nina,...quiero cuntornar ls silbeirones, mas nun puodo!...
Son de tal modo grandes que iá nun me deixan abistar las sharas i ls temielhos!...Mas para quie que medraran tanto ls silbeirones?...


Sento me outra beç i eimagino, cun ls narizes bien abertos, l perfume que ben ne l´air!...
Esfrego las manos i mangino-las pegachosas... como se las sgodasse nas sharas i assi, bou cheirosa para casa.
Cheirosa,... mas nostálgica!...

Quando la strada baixa la praineira de ls sentidos, fai-se lebe l camino zde l Naso a la Moreira…

I you!...Cun ls uolhos birados pa l cielo!... Eimagino-me ancarrapitada a quemer moras i apuis, en la pocica de la piedra, a fazer bino cun eilhas e a chupá-lo con ua palha de çanteno!...

Quando...
La lhéngua medra nestes puiales
malhan nas teclas ls dedos:
anzonas, cuontas, lhonas,
suspiros de coraçones
an libricos birtuales.

I you, neste rinconico...
nien eimagino,
quien eirá a ler l librico!...

Quando...
la mandei lhebar ua carta para Lisboua; un die fui-me atrás deilha;
agora nun se farta de traier cartas de Lisboua, que ie mi grande la suidade, i quanto mais la scribo
mais me crece:
I assi bibo!...

Bibo an dous lhados, debedido antre l trabailho i acá.
Quando stou an Lisboua eimagino i percuro:... Quando tornarei para alhá?

Quando stou a salir, iá stou a pansar quando bulbirei iá!...

Quando...
l praino,
borracheiras de berde arrespinchadas de magárcias i papoulas sbolácian nas ourrietas, quedan prenhados de quelores, tanto machos cume fémias!...

I you, ando purqui, l sul de l Teijo..., antre fumos i gente que nun me quier falar,…
eimagino ls quelores... i tamien, me quiero alhá amprenhar!...

Quando…

La lhéngua medra nestes puiales
málhan nas teclas ls dedos:
anzonas, cuontas, lhonas,
suspiros de coraçones
an libricos birtuales.
Quando...
l soalheiro me spera a la brigada de ua ramalhada i you stou mui longe de ti, mie tierra,... só de me lambrar que ie tiempo de merujas, pon-se ua auga na boca!...


Antón,...pongo-me a eimaginar l sou sabor, fago ua selada de alface de la de estufa, cómo-la cun ls uolhos cerrados i quiero crer que son merujas!...


Quando...


11 comentários:

Abelhon disse...

Quando ...
la estrada baixa la praineira de ls sentidos fai-se lebe l camino zde l Naso a la moreira.
... quando e siempre.

Abraço

Adelaide Monteiro disse...

Ei!
Parecie me que iá te tenie escrebido i nun beio nada!
Screbiste ua cousa mui guapa, Abelhon, tio de la Abeilha.
Gusto de l tou nome!
Inda hemos de fazer ua stória cuntigo.

Beisicos

Anónimo disse...

Guapo, eicelente.

Que mais se puode dezir d'alhue tan poético!?

Que esta ida a la Speciosa sei chena de froles.

Beisicos
Faustino

Adelaide Monteiro disse...

Iá stou acá. L termo inda stá un pouco triste mas inda hei de screber algo, a oulhar pa ls touçones de la Moura, deiqui de la mie baranda!...
Nun beniste?
Beisicos

Anónimo disse...

Nun puodo

You solo bou a Zenízio ua beç pur anho ye nas bacanças de l berano, ende si quedo-me l tiempo todo

Dá besitas mie als mius parientes i coincidos,i un poulo a Zenízio, besitai tie Sara ne l "Molinico" (arrimado a la bielha scuola, hoije l'Associaçon) que ye mie cunhada, tie de José Marcelino, serás bien recebida.

Beisicos

Amadeu disse...

Quando... aparaba,
i anquanto nun bolaba
i ls dedos cuntaba,
l mundo paraba:
por esse sfergante, de berdade,
antraba l'eiternidade.

Amadeu

Adelaide Monteiro disse...

Assi stá bien!
Cuntinua la conta... hemos de la fazer quaixe que anfenita...puodo poner alhá la strofe?
Adelaide

Adelaide Monteiro disse...

Abelhón,
Acreçantei l quando...cun l tou cumantário.
Tenarás que me processar!...Dreitos de autor!...
Adelaide

Abelhon disse...

Quando ...

borracheiras de berde arrespinchadas de magarças i papoulas sbolácian nas ourrietas, quedan prenhados de quelores tanto machos cume fremas.

... quando: l Praino

Amadeu disse...

Quando...
mandei-la lhebar ua carta
para Lisboua; un die
fui-me atrás deilha; agora nun se farta
de traier cartas de Lisboua, que ye
mui grande la suidade, i quanto mais la scribo
mais me crece: i assi bibo.

Amadeu

Abelhon disse...

Quando ...

la lhéngua medra nestes puiales
málhan nas teclas ls dedos:
anzonas, cuontas, lhonas,
suspiros de coraçones
an libricos birtuales.

... quando l soalheiro ...

Enviar um comentário

Arquivo do blogue