Nua pinga d´ourbalho

                                      

Quando la nuite abaixa a la mie mano

i sperta ls faleitos

que alhá nacírun cun l ourbalho,

medra an mi la gana de beisar ls rebentos,

d´sigurar las fuolhas,

de cerrar las puortas al friu,

d´abrir ls braços a la Primabera.

 

Quando la nuite abaixa a la mie mano

 i me refresca la rosa i alisa ls spinos,

me speilha l cara ne l setin de las pétalas,

i cun las fuolhas m´encera la piel,

ferbe l bulcon, calece-se l tiempo

i medra an mi l deseio de quedar

i de m´ abrir al nuobo die.





Imagem da net