Moçambique

Moçambique
Parque da Gorongosa

Douro

Douro
An cama de mofo

quarta-feira, 6 de maio de 2009

Cumo an tiempos

...oube-se dezir muita beç que las cousas yá nun sáben cumo d´antes; you yá l dixe, debendo-se esso a la maior fartura ou l modo cumo ls bichos són criados. Siempre me pareciu a mi que tamien ten a ber cun la forma cumo se comen, cumo són serbidos, l ritual d´an tiempos.
Hoije you i mie mãe almorcemos cumo an tiempos: Lhebei las costelhicas de cordeiro para assar ne la brasa an casa deilha, fazimos ua selada de alface que fui a colher ne l momento al quintal, lhabei-la a la puorta ne l baldo, al sol. Todo amporta pa l ritual... Són pequeinhas cousicas que fazen la çfrença!...
Algo que tamien fai la çefrença ye la forma cumo ye serbido; hoije para nós dues tubo que ser, cumo debie ser.... Claro que hai gente que nun gusta assie, mas nós las dues, si gustamos.
Puse ua mesica pequeinha i baixica,sintei-me nua talhica, puse l cordeiro nun prato, la selada nua barrenhona que you gusto muito de berdura, pan partido na mesa.
Prato para quei? Chicha an riba l pan ne la mano squierda, ua faquita de Palaçuolo na dreita, i selada tirada de la barrenhona cun garfo.
Ua marabilha, digo-bos you!... Tornei anhos i anhos atrás!...Claro que nun podie faltar, pegar ne ls uossos cun la mano para arrebanhar i lhamber ls dedos al fin...
Sólo faltou botar ls uossos pa l chano, pa la perra quemer. Esso, si nun fiç!...
Mie mãe tamien gustou muito i rie-se cumigo dezindo: Tu si sós bien aldeana!...
Que rapaza esta que nun ye nada ampalagosa!

4 comentários:

ACangueiro disse...

You nun sou ambejoso mas cachicos assi...crece l'auga na boca.

Adelaide Monteiro disse...

ye bersade amigo!... Stando sóla cun mie mãe, parece mesmo que tornei atrás ne le tiempo. Quien nun bibiu eiqui nun sabe dar balor a estas cousas...
Beisicos,
Adelaide

Isilda Nascimento disse...

Cumo you conheço esse ritual!!
Stou cumo Cangueiro diç, até me fazes crecer l'auga na boca.
Eiqui na cidade nada desso se puode fazer.Solo buonas maneiras i etiquetas. Para quei cumplicar se la bida debie ser assi, tan fácele.
Aprobeita amiga. Ccontinuaçon de buona stadie
Beisicos,
Eisilda

Adelaide Monteiro disse...

Tu ye que me antendes!...
Hoije fiç un arrozico i si puse prato, bá; l restro fui l mesmo, an casa de mie mãe, adondo mato melhor las soudades.
Beiso
Adelaide

Enviar um comentário

Arquivo do blogue