Moçambique

Moçambique
Parque da Gorongosa

Douro

Douro
An cama de mofo

domingo, 18 de janeiro de 2009

L Natal - Las stórias de tie Purdência III


Come iá bos dixe, tie Purdência tem cinco filhos; dous filhos i trés filhas i doze nietos. Trabalhan na laboura i crian bacas mirandesas i doutras raças. Un genro tamien era ferreiro i fazie facas que cortaban mi bien, mas esse iá se morriu. L tractor ambolcou-se i el quedou debaixo; tubo mi pouca suorte, el i Celeste que iá stá solica. Só tenie cinquenta i nuobe anhos.
La filha mais nuoba ie que studou i ie porsora. Ls outros nun studoran porque tenien qu´ ajudar a sous pais na laboura.
Ls nietos uns stan ampregados purende i outros studan , an Lisboua i no Porto. Andan a la bida d´eilhes. Son mi pimpones todos, tanto ls rapazes come las rapazas mas a la tie Purdencia i al sou tiu yá l custa muito acumpanhar las modernices d´alguns.
La filha mais nuoba, que ten agora trinta ei seis anhos tamien ie algo ampalagosa, anté pinta l pélo de burmeilho, mas destas cousas falaremos apuis.

"Las mies filhas andan-me siempre a dezir que la Consoada i l Natal iá habie de ser an casa dun d´eilhes, que you iá bou indo bielha i nun me habie de cansar tanto, mas cun setenta i dous anhos, inda m´ acha capaç de fazer las cousas, i oulhai, eilhas ie que fazan quaisque todo que son mi zambuoltas.
Inda pu riba tengo a mie mai que stá ls meses quemigo i cun mie armana Juquina que bibe an Zenízio. Este anho pur acauso nun stá eiqui mas outros anhos ten habido que passa l Natal cun nós."
Sue mai inda stá mi rexerta pa l eidade que ten, iá fai nubenta anhos l dieç de Febreiro. Stá un pouco tulhida de las piernas, mas inda ten bon santido.

"A las beçes iá sinto uns delores nos renhones, mas antes de botar ls uossos na cama, caleço ua teilha no lhume, de las feitas an tiempos nos fornos de la teilha i pongue-la an riba de las cruzes i apuis ls delores ban passando. Para dezir la berdade you tamien nun sou mi queixona i ando siempre a dezir a las bezinas que s´eilhas nun se queixassan tanto de ls delores, nun l dolie la mesma. Cierto ié que tengo que me aguantar porque cun mie mai para aturar, zegraçada de mie se fico mala!"
Las bezinas bien l dizan que se nun se queixa ie porque nun l dulirá muito i sará ua bardade.
Quien se queixa iê purque l duel.


"You gusto de tener la família an mie casa l Natal porque oulhai, la mie nora Antonha nun se dá mi bien cun la mie Ana, cousas mais de anbeija qu´ outra cousa. La única maneira de mus juntarmos todos ie eiqui i todos somos vinte i trés personas.
La casa ie grande i las cousas son feitas a la nuossa moda, arrimamos mais uas mesas i bamos a bescar mais uns scabels a la casa de riba i quedamos bien. L que resta ie que stamos todes an família.
Ls doces trazan ls eilhas. You cuozo l polbo i l bacalhau cun batatas i tronchos i fago um arroç doce que me sal mui gustoso. Feito cul lheite de la baca ten buona çefrença.

An nuossa casa naide anda cun las pantemineirices de l arble de Natal nien cun las prendas, cume se anda purende a fuora e acá tamien yá hai quien ande, bá. Essa stória de l Pai Natal a mi nun me chalda. Al Menino Jesus está n´ eigreija i beisa-se alhá; fui assi que ls mius me ansinoram quando you era pequeinha i era el que me punie uns figuitos na chola que you deixaba a la nuite, al pie de l lhume, cume me cumbancie mie mai."
"L que gosto muito ie de la Missa l Galho. Apuis ie ua grande alegria la família toda na missa i oubir las mies filhas a cantar aqueilha cantiga, beisai l Menino, beisai l agora, beisai l Menino que ie de Nuossa Senhora".
"Alguns de ls nietos iá nun l gusta muito ir a la missa, mas quando ie no Natal si ban. Eilhes son mi buonos, mi esmuleiros, mi hounestos i trabalhadores, mas anton nun cuncordan cun muitas cousas i oulhai a mi tamien me pareca que l que balan son las obras. A las bezes bamos a la missa i apuis somos tan malos!"

Cuntinuaba cum´ua carreta spanhola: Las prendas para quei? You dou ls todo l anho, quando l mando las arcas chenas daquilo que you tengo, seia chicha, freijones, garbanços, chícharos i tod´l resto. Para quei andar cun mufusices con aqueilhes ambrulhos i ls lhacicos? Staba yoi bien cusida,( eilha fala mi mal i diç por claro) se tebisse c´anrebulhar en papel i lhaços ls sacos de batatas!... Caralcho..., bal mais la fartura qu ls lhaços queloridos!
Tie Purdência alhá cuntinuaba falando, anquanto arranholada, cosie uns miotes de l sou tiu, feitos de lhana de las sues oubeilhas. Fai ls eilha porque diç que ls cumprados nun son tan calientes i fazan sudar ls pies.
E cun estas i cun outras alhá se fui eilha, cun la matraca bien zanferrujada, d ´eilhi a la Funtásia para traer um munton de coubes trunchudas, sien s´l squecir desta beç, de lhebar um caiatico para s´astribar quando passe na resbalina qu´hai a la frente de l antrada de l eigreija.

"Tamien nun sei qual fui l eidê de las mardomas de Nuossa Senhora, arramaran l auga eilhi para furmar aquel resbaladeiro"!...
Iba eilha andando, resungando i atirando pragas....

Sem comentários:

Enviar um comentário

Arquivo do blogue