Moçambique

Moçambique
Parque da Gorongosa

Douro

Douro
An cama de mofo

terça-feira, 14 de julho de 2009

Reissenhor





Scapeste-te, reissenhor
sien ua fala, sien ou beiso
sien un abraço.
Porquei, miu amor?
Stabas muorto de canseira
ou tenies miedo de l friu?
Torna, reissenhor,
you dou-te la calor.

Sinto la tue falta,
tu eras l soprano, l barítono
pula manhana,
nel miu spertar;
tu dábas-me l rítmo
al miu caminar!

Que triste me sinto
sien ls tous sonidos!

Ls perdales, ls mielros,
i ls tordos quedúrun,
mas tu sabes queilhes
nun són cumo tu,
nunca me amórun
i nien you a eilhes.

Por ti me ancantei,
por ti me apaixonei,
mielgo de la mie alma,
por ti yá chorei.

Agora reparo,
a apurar l oubido:
fraquito, fraquito,
mas ye un sonido!

Scapeste i deixeste
outro, an tou lhugar.
Reissenhor nobico,
spera un cachico
que you bou-te a ajudar,
a cargar l´ourquestra
i ls sonidos afinar.

Reissenhor nobico,
ansina-me a cantar!

4 comentários:

Isilda disse...

Oulá amiga Adelaide!

Mas que guapo hino al Reissenhor!

Yá tenie suidades de lher las cousas guapas que scribes. Stube ne l Algarbe a passar ua sumana y claro, sin anterneta. Yá li todo l que screbiste, que ye cumo siempre marabilhoso

Beisicos,
Isilda

Adelaide Monteiro disse...

Tamien you stube no Algarbe. Que pena que mos podiemos tener ancuntrado!
An que sítio?
beisicos

Isilda disse...

Yuo stube en Portimão - Praia da Rocha.
Todos ls anhos passo ua sumana, na purmeira ó segunda sumana de Júlio.
De beç an quando faç bien mudar d'aires.

Beisicos
Isilda

Adelaide Monteiro disse...

Tamien you stube bien acerquita, dadonde, de l terraço, beio la Praia de la Rocha.
Que pena!
Quando tornares di-me que you stou muita beç alhá.
Bs

Enviar um comentário

Arquivo do blogue