La buieira

You inda era bien pequerrica i yá iba c´ las bacas i siempre resungando i a las beçes chorando porque miu abó tenie ua baca que l chamabamos Mourisca i que lhougo de pequeinha eilha i you, me scornaba i you la anchie de lapadas. Come bedes éramos mui amigas.
Ne l Eimbierno nun iba siempre cun las bacas, mas no berano era todo santo die, a la purmanhana i a la tarde. Alhá fui medrando assi.
Agarraba ne l pimiento cun las formigas de ala i las rateiras i nunca benie para casa cun las manos a abanar, trazie siempre uas frejuladas de paxaricos, fussen eilhes patoixas, funecras ou cuquelhadas.
Nunca tube nenhua monica, a nun ser las que you fazie de farrapos i siempre me ambaie cun cousas assi. Tamien gustaba muito de me ancabriolar nas arboles a ber se achaba algun nial de picanço, de rola ou de melra i de me chubir an riba la burra a scatrapolhar. Inda tengo bien marcas de las lhumbeiradas que dei d´ eilha abaixo.
Tornando a la boieira , la gente pon-se a cagar lampainas i fican las stórias a meio.
Nunca fui capaç de prander las bacas na loija por causa de mie amiga Mourisca. Se you antrasse na loija, dába-me uas scornadas que até me butarie pal triato ou para la strequeira. Tenie qu´ ir a chamar a tie Delina ou a tiu Einácio que era belhico, mas eilha cun eilhes deixaba-se prander, staba quieta i portaba-se que nien un anjico. A mi tenie-me raiba i you tamien a eilha.
Tio Einácio, coitadico, tenie un mal i staba quaije que siempre a drumir. Quando iba a mejar, drumie de pies con la marangalha na mano, birado pa la parede.
Angraçado que nun se caie, nien el, nien la marangalha!...