L que deziêmos i bamos dezindo

• Quando puniran l´antena de l Ótimus, no alto de l Sierro, staban alguns a falar i un pegou no telemóbel i dixo: Inda nun ten rede! Ten si senhor, andaban l a puner onte quande you passei alhá, dixo la mai dun d´eilhes.
• Aqueilha tie canta tan bien que bira la boç par´onde quier. Parece un Reissenhor.
• La tie cun las manos debaixo de l mandil dezie, "tenemos isto mi friu". Si, si, se isto nun andreita, estamos mi mal, respundiu l tiu cun las manos drento ls bolsos a l mesmo tiempo que se iba esfregando na bragueta.
• Ricardo, un nieto de tiu Antonho Munteiro que Dius l tenga an bon lhugar, quando era pequeinho i staba acá no Berano cun sous abós i sou armano a passar férias, quando biu la baca a beber auga de l chafariç i a mejar l mesmo tiempo: "Abó, la baca stá rota!"
• Ls mesmos ninos a las pegas chamaban l perdizes lheiteiras. Eran bien listos ls rapazes, para eilhes eran pedizes negras i brancas, cume las bacas lheiteiras.
• Ua beç Marie Gorete de tiu Mário iba a la rue arriba i saliu um bitelico cun poucos dies pala rue i eilha precurou: Stá touronda? Stá, respundiu l tiu Furmino. Antón, chebai l bui!
• Ua beç ua tie percurou a l outra, à tie Marie iou esta nuite fiç aquilo cu l miu home i soube-me tanto! You agarrarie-me?