![](https://blogger.googleusercontent.com/img/b/R29vZ2xl/AVvXsEg_D9M0P8I7LGL7P_-ePT1TlMMVPVgph7qKp2WyzEW9uDP2g7LFpzYObvPanuS3qJmv1N4Cnq9Z9BVNogSRlAmKfThBsdigKdVp1Q0vumZJlDgy-Ljq22Xclj6tszkIa7YYpv7NFtCiDXM/s400/mulher+ao+espelho.jpg)
Miro-me al speilho
i beio
las ronchas de ls anhos, de ls dies
passados cun tristezas i alegries.
Nun quiero tirar las mies angúrrias
i las manchas tampouco;
eilhas eisísten por algo.
Son passaiges dua bida,
son amores i zamores,
son ua bida bibida, a las bezes
an sprança perdida
i lhougo renacida.
Miro-me al speilho
i beio rialidades, sigurança i autostima;
beio la sprança que adomina
ne ls dies que cuorren mais debagar;
beio ls lhugares para adonde nun quiero ir
i aqueilhes adonde quiero quedar.
Miro-me al speilho
Sien nostalgies de l que perdi i
sien proua de l que ganhei.
Ganhei calma, perdi belheza
i beio agora cun clareza
que la maior belheza
ye la belheza de l’alma
i star biba ye la maior baidade.
Miro-me al speilho, cun serenidade!...
Sem comentários:
Enviar um comentário