Sien tiempo i cun todo l tiempo
An caminada sien çtino
Fumos a parar a Peinha Lhastra
Ne l termo de San Martino
Passo cierto i cuostas dreitas
Alhá bou you apressiada
Para curar las mies maleitas
Todos ls dies ua tirada
Fumus pula strada anté l Naso
I bien mos custou a trepar
La perra cun la lhéngua de fuora
I you yá benie toda a sudar
Cun centeno berde fazimos
Ua pipa bien afinada
Jomba nunca habie oubido
I quedou admirada
I you tornei l tiempo
An que cun las pipas fazie
Ua ourquestra afinada
Sonidos grabes ou agudos
Solo dependie
de l que la canha
Era na tiesta amachacada
Especiosa ye ua aldé de l cunceilho de Mirando de l Douro, çtrito de Bergáncia. La lhéngua falada ye l mirandés mas poucos la sáben screbir por haber sido ua lhéngua oural. Agora sendo oufecial yá puode ser screbida cun regras. Ye an mirandés que scribo eiqui nesta jinela birada pal mundo. BIEN BENIDOS EIQUI i an, http://www.adelaide-monteiro.blogspot.com
Moçambique
Parque da Gorongosa
Douro
An cama de mofo
2 comentários:
Oulá Amiga Dlaide
-Guapos bersos
-Parabienes por puxar al de ribas estas cousas que stan adrumecidas.
-Cuido que Jomba ye l nome de la perrica!?
-Quando era garoto an nuossa casa habie un perro que tenie l nome de Martelheiro ( nunca soube porquei este nome)i era mui spirruolho, querie siempre ua códia de la tie que lhebaba las cartas to las manhanas a la Speciosa.
-Lhembras-te dessa tie?
Beisicos
Faustino
Ei, Faustino,
Si, Jomba ye la mie perra, mi linda i mi fina; Ye ua Lassie, l nome Jomba ye de Moçambique, fúrun ls mius filhos que la batizórun.
Quanto a la tie de l correio si se me aparece que me lembro de la tie de Zenísio. Mie mãe falou l outordie deilha, nun sei porquei.
Las pipas eran mi anteressantes. Las de amachacar na tiesta i las outras cun la canha mais cumprida a apanhar l nuolo i apuis cun un golpe feito cun la nabalha. L pormeira beç que l fiç ua als mius filhos scangalhórun-se cun la risa.Fui l que fizo la mie perra.
Beisicos, Faustino
Adelaide
Enviar um comentário