Naciu d´ua piedra;
Abriu-l ua brecha,
Dadonde saliu tierra.
Preinha de bida
Nasciu ua flor,
Mie armana, quelorida,
Cun mui fuorte oulor.
Burmeilha de sangre,
Relhamposa de streilha
Punírun-me-la na mano,
I nasciu un ramo deilha.
Puse ua ne l pelo
I tan anfeitada
Assi cun la flor,
Alegre a cantar,
Ancomecei a beilar.
Las outras flores
Que tamien eran papoulas,
Quejírun, fermosas,
Ne l baile entrar.
Cun las pétalas para baixo,
Fize-l saias de beilarinas,
Cun cascas de freixo,
Fize-l sabrinas.
L chasco cantou
Cun la coquelhada
I staba, deilhi a cachico
L ourquestra formada,
Ne l Rinconico.
Las flores beilarinas,
An bicos de pies,
Beilórun que nien
Berdadeiras ties.
I las checharras
Ampeçórun a cantar,
I quando se ajuntórun,
Batírun-l palmas
I tamien beilórun.
Quando beio papoulas,
You agora, nina-tie,
Siempre se me lembra,
De l que cun eilhas fazie.
I, Çculpa-me papoulica,
You yá nun tengo eidade,
Mas quiero fazer ua monica,
Beilar, matar la suidade.
8 comentários:
Oulá mie amiga Adelaide.
Ua beç mais bino la mie anfáncia a la mimória.
Que guapas éran essas monicas que faziemos de papoulas!
Beisicos.
Isilda
Las papoulas són flores fantásticas, cun que muito me eidentefico, pela sue quelor i singeleza.
Eran de ls cousas mais mágicas daquel tiempo, pa las ninas.
Recordaçónes que abiban sentires.
Bs
Ora spurmenta a fazer ua monhecrita, tira-le l retrato i amostra-la cun dous bersos cumo tu sabes fazer.
Tamien stou a ber quando usas ls retratos de la luna.
Bamos a fazer de la nuossa lhéngua un hino a la alegrie i nó fuonte de lamentaçon.
Bs
Almendra
Ei Almendra!
Sabes, l mirandés cumo qualquier outra lhéngua tamien sinte la cousas tristes atrabeç de quien l screbe i de quien l fala.
Bai salindo de todo i ye dificil screber quando nun se sinte. Sona a falsidade, ye un parir sien grabideç!
L que ye perciso ye que baia salindo i tamien cun crítica; hai muita cousa a criticar.
Diç-me ua cousa, la tue tie chama-se Marília? Çculpa, mas yá uns dies que staba para te percurar.
Beisico,
Adelaide
Oulá, Delaide!
Si, la mie mulhier ye la Marilia que andou ne l coleijo. Agora nun anda muito de ler, mas you bou-le cuntando l que scribes. Diç que l parece que debes ser porsora de pertués. Agora para ler tengo que l ampremir ls testos, diç que para clicar yá bondo you. :)
Bs
Almendra
Sabes que me dou un clic eiqui hai uns dies porque stube cun eilha nun ancontro de l coleijo yá uns anhos, l tou nome nun me sonou a stranho i po ls bistos cheguei alhá.
Acho que inda cheguemos a ser de la mesma turma ou acerca. Dá-l beisicos. Nun era porsora de pertués mas si de la área de Gestão, contabilidade, fiscalidade, informática de gestão.
Tengo gustos mui dibersificados.
Beisicos
Adelaide
Marilia manda-te tamien beisicos i diç que na Trindade yá falais, mas diç a ber se tenes un retrato cun la Maria Ortega que stube cun eilha na casa de tiu Agostinho an Miranda.
Eilha muitas bezes fala-me de bós i de cumo falabades ls mirandés. Eilha ye que me diç muita palabra de l mirandés de la raia (lembra-se bien de bós)i de Dues Eigreijas, porque l abó era d'alhá.
Bs
Almendra
Almendra,
Cun Maria Ortega nun tengo retratos. Bi-la inda nun hai muito tiempo na Speciosa, eilha tamien stá reformada i ten alhá casa. Diç-l a Marília que inda somos cumo dantes, brincalhonas i bien çpuostas.
You quando iba de las férias de l Berano, anganhaba-me muito i botaba-me a falar mirandés i claro, las fidalgas rien-se de mi!
An Agosto bemos-mos i yá tocamos la palheta bien tocada.
Beisicos a ambos a dous.
Adelaide
Enviar um comentário