Moçambique

Moçambique
Parque da Gorongosa

Douro

Douro
An cama de mofo

terça-feira, 14 de julho de 2009

L silénço de las palabras


Sperneio las palabras,
ampuxo-las contra la parede,
para me defenir;
quiero me corregir,
mas las palabras
ancerran-se an silénço,
nada me dízen.
Porque serei you aquilho
que nun quiero
i trilho
ls caminos gretados,
pies çcalços,
cansados?!!
Porquei
que quando quiero,
a seguir nun quiero,
porque nun debo?!!
Porquei
que l poder de la rezon
se subrepon a la lhebeza
de l coraçon
i l faç sangrar,
perdido,
zbanecido,
golpeado de muorte,
antregue a la sue suorte?!!
Chacualho las palabras
nun frenesin de loucura,
nua ánsia d'afogado,
mas las palabras,
ancerradas an quelousura,
an pato cul nun querer
que me aprisiona
i nó me deixa ser,
cerran-se an silénco,
a este silénço...
al miu silénço,
l silénço de las palabras.

11 comentários:

Unknown disse...

Roubei-te un retrato para l HOIJE:
http://www.sendim.net/noticias/hoije/noticias_titulos.asp?id=661
I hoije fiç la ambora de las sendinesas, mas cumo gostarie de achar las palabras tan bien cumo tu, para que la ambora fusse mais apropiada a eilhas.
http://www.sendim.net/noticias/hoije/noticias_titulos.asp?id=671
Beisico
Almendra

Adelaide Monteiro disse...

Carai, Alendra, si me poniste bien nuoba na ambora! Sólo tengo mais 42 anhos i quilos nien digo que me ambergonho...
Gustei de la cena-fiesta de las sendinesas.
Beisico

Unknown disse...

Bés cumo bal la pena fazer comentairos, nun me saliu essa de la cena-fiesta. Yá bou a eimendar. Esto de screbir todos ls dies las amboras, ir a saber deilhas, tirar retratos i a las bezes cumponé-los, nun dá para fazer todo bien.
Bien haias
Bs
Almendra

Unknown disse...

L HOIJE ten un blog para anformar i recebir anformaçones i yá pus alhá:
- L HOIJE chega a todo lado i son centenas las pessonas que l léien todos ls dies i de todo lado bénen eideias buonas i até reparos de cumo se dében dezir ciertas cousas an mirandés, nun podemos andar a amirandesar las palabras pertuesas, quando las hai ne l mirandés, mas ua léngua quando ampeça a ser scrita ten siempre l bício de ir a saber de palabras nas outras lénguas, an beç de las achar neilha própia. De la scritora mirandesa Adelaide Monteiro de la Speciosa bino i bien, l reparo de que an beç de "jantar" cumo you screbi na ambora de l die 13, quedaba melhor "cena-fiesta", pus yá eimendei. Daprendemos tols dies.
Almendra -
Tamien tenemos que fazer pedagogie.

Adelaide Monteiro disse...

Tu sós galiente!
Nun era para eimandar, mas se assi fui, resultou bien, senhor porsor!
Beisicos

Adelaide Monteiro disse...

Baliente! Çculpa que me anganhei. Sou tan tan pouco scorreita ne ls uolhos... ou serei çtráda? Porende!...

Adelaide Monteiro disse...

tornei-me a aganhar i quando me apurcatei l cumputador yá tenie çpachado l embio. Çtraída.
A cada çachada sue lhumbriç!

Unknown disse...
Este comentário foi removido pelo autor.
Unknown disse...

Quien ama nun pensa i tu amboubeste-te cun la lhéngua, ye cumo you al fazer l HOIJE scribo cunsante me sale, mas l cumputador inda pensa menos i cuida que solo hai ua lhéngua oufecial i pimba, an beç de ua cousa sale outra.
Quando bou a un sitio fago lhougo dues ou trés amboras i die 23 de Junio fiç de la Speciosa, que you fui al piquenicon. Tamien fiç de la Senhora de l Picon. You iba muita beç a la caça para l cabeço de l Naso i conheço l termo a palmo.
http://www.sendim.net/noticias/hoije/noticias_titulos.asp?id=651
Bá toma tino ne l que scribes.

Adelaide Monteiro disse...

Secálha coincies miu pai que era caçador. Fui caçador guia de safaris an Moçambique.
You nun tengo tino que sou mui çtraída; nun leio al fin i apuis mira ye esso.
Bs

Adelaide Monteiro disse...

Yá li l ambora de la Speciosa. Que guapa ye la mie tierra. La mie casa queda acerca l forno.
bien haias por me teneres lhabado ls uolhos cun esse cachico.
Bs
A.

Enviar um comentário

Arquivo do blogue