Ls niales de mariepiendula son guapíssemos, dezie-me Francisco, no magosto de l Nial de la Boubielha. Y la mariepiendula tamIEn ye guapíssema dixe you; ye amarelhica i tan singela.
Hoije puse-me a magicar i a pensar ne l mundo de la peixarada.
La mariepiendula ten que ser artista, quiçá arquiteta i daqueilhes arquitetos que todo l que projétan i crian ye ua obra de arte.
Aquel nial na forma de cesta tecido, cun asa i todo, ye ua porfeita obra de arte.
Artista refinada i buona mai, sólo puode ser tamien, para fazer un berçio tan lindo als sous filhos.
Se you pertencisse a esse mundo de paixaros acho que gostarie de ser mariepiendula, anque gustasse de ser un pouco menos amarielha.
Gustaba de ser un pouco mais queloradica que la mariepiendula i tamien bolarie mais que eilha. Serie sien dúbeda ua mariepiendula mais lhibre.
Ponerie un pouco de amarielho na andorina i serie ua andorina cun alguas prumas de mariepiendula.
Gusto mais de la bida de la andorina, siempre a biajar, a passar an riba de las pessonas cun sous bólos rasantes, sendo que tamien eilha ye artista a fazer la sue casa de barro, tornando a eilha to ls anhos na Primabera, adonde, se pudir naceran ls filhos de to la sue bida.
Ua mai dedicada, i ua artista an olarie capaç de cumpetir cun ls ouleiros de l´Alanteijo ou de Mobeiros, sien percisar de oufecina.
Bolando sien parar, einérgica, cuntenta, dun lhado pa l outro, asparecendo que a las bezes eirá a aterrar, mas alhebantando debrebe, cumo se fura un abion an eixercícios acrubáticos.
Çculpa mariepiendula recatada, mas you si quiero melhor ser andorina: Andorina cun algumas prumaiges amarielhas, de las tues.
2 comentários:
Als nials son como las casas de la Speciosa Adelaide - y la Mariepiendula debe ser l'artista :-)
A mi gustabam-me todos. Al de la cigunha an riba de l'ulmo dal ribeiro por exemlo. Cum las cigunhas alha castanhando ou so anriba d'ua pata, tan prouistas.. Ua bez iba-me chimpando d'el abaixo: fui alha riba als pardals y bufou-me ua queruja de repente alha dum buraco. Outra bez passou-me ua parcida num freixo dal cerrado de Ze Batista en ourrita lhonga: meti la mano no nial dum pito y salta-me d'alha um lhagarto! Num sei qual de nos quedou mais assustado.
Als nials de pega, tamien grandes cum barro y galhos, als de gralho, de picanco, de melra cum ls uobos azuls... Als de trocal siempre nos pinhos mais altos para que fazissemos ginastica para chubir.. Y als dal chano como de chinchara ou de cotobia.. Y anton als pequeninicos de las funecras? tan sensilhos..
Mas si teneis toda la rezon qu'als de Mariepiendula asi spindurados son specials. You en toda mi bida so bi dous our tres siempre pal molinico, dal lhado de las lhameiras - outenticas obras d'arte
You tube un eiqui an mie casa que tamien tenie forma de cesta, eigual a este de l retrato, mas nun sei que paixaro era. Bei tu, eiqui no telheiro al pie de la churrasqueira, atras duas cousas que habie colgadas na parede.
Ls animales ansinan muito als humanos, an to ls domínios, assí nós quergamos antender...
Bs
Enviar um comentário