Uolhos fixos i tristes
Miran l hourizonte
I nada beien.
An ti sólo bés las penas
Drento,sintes-te uoca.
Sós ua gaibota solitária
Que habita l mastro
De un barco a la deriba ne l mar.
Spabila-te!
Bóla para aqueillas faias,
Sal de ti
I de l tou mundo.
Nun bés que te bás a afogar
Nesse mar anfenito
Que te angulhirá
I que debrebe te botará
Pa las óndias a flutuar?
Bai gaibota!
Sál dessa einércia de muorte
Nun te entregues a la tue suorte
Pesca, come, ganha coraige
Deixa l mastro, sigue an biaige!
Bola gaibota!
Atrabessa l ouceano, pára nun coral
Oulha las augas de puro cristal.
Bai para aqueilha praia
De augas mansas
Adonde jogan ninos
Que speran por ti.
Canta gaibota!
Canta cun la tue boç rouca
I bate las alas cun fuorça
Bai a tierra, buolbe l mar.
Bai gabiota!
Bai cun ls ninos suonhar.
Spabila-te, gaibota!
2 comentários:
Oula amiga Adelaide!
Mais un guapo poema, desta beç dua simples gaibota, daquelhas que bólan solitárias pul mar sin fin.
Agora diç-me ua cousa que you nun sei bien l significado ye la palabra "faias"( Bóla para aqueilhas faias) . You conheço la palabra "fraga" y "peinha" .
Hai muitas palabras que yá se me çquecírun.
Beisicos,
Isilda
Són ls penedos mais altos tipo penedo amarielho. You tamien nun coincie; Amadeu ye que me ensinou.
Na Speciosa diç-se fraga, fragónes, penedo.
Beisicos
adelaide
Enviar um comentário