Nuite de lhunar

...debie ser pribido, digo you!
Si, ye un assagar de sonidos!... Tener bidros duplos nua aldé debie de ser pribido.
Cheguei agorica mesmo de casa de mie mãe, de ua punta de la Speciosa, a uns quinhentos metros de la mie que queda ne l meio de l termo antre cerrados i cortinas.
La lhuna an quarto crecente abançado dá ua lhuç mágica i clara que quaije que parece de die.
La nuite nun stá frie.
L´air friu que assoprou a la pormanhana calhou-se lhougo a hora de almuorço.
You i la perra Jomba benimos a caminar, mais ou menos a las dieç de la nuite.
Tan fuorte era l cantar de ls grilhos por estas cortinas que se se tebisse fechado ls uolhos parecie que stabamos ne l Berano a oubir las checharras, al rechuino de l sol.
Ye fantástico que nun se me lembraba que cantasse ua tan grande quantidade de grilhos.
Quando puse la chabe ne la puorta tenie un, esse de la família, que cantaba andrento de l chupón.
Para mie tristeza, an casa, de tan citrada que ye, ne las puortas, jinelas, bidros duplos i todas las modernices, nun se oube nien raça de ls sonidos de la rue.

Hai cousas que nun se puoden çperdiçar; nun sabemos se manhana las poderemos bibir. Besti ua camisola mais caliente, fui pala baranda i eilhi quedei cun un caderno i un lapeç na mano, a mirar la lhuna i a oubir l que la natureza me ouferecie.
Puode ser que naça un poema...