Nun se afai

...por muitos anhos que steia a bibir ne la cidade nun se afai a este maldito bício que las pessonas tenan de nun falar uns cun ls outros!... Nun se afai nien se debe de afazer.
Eilha al menos cuntina a dar las buonas tardes quando entra ne l prédio adonde moran ls filhos, mas bei ne la cara de la gente que pensan que ye ua simplica que anda polhi.
Nun se l amporta, que l chámen l que eilhes quejiren, há-de dezir buonas tardes ou buonos dies mesmo que naide l bire l cumprimento.
De l mesmo modo l passa quando bai de camboio de Sintra para Lisboua.
Bai sintada l pie de ls outros que mais parecen uns caramonos. Que gente, parece que stán todos anraibados uns cun ls outros.
Un belhico, cuitado, stá deseojo de arranjar cun quien zabafar ls sous delores. Bai falando, falando, mas ye cumo se eilhi an beç de gente, fussen peinhas!...
Bira-se para eilha! Zque bei que l dá ua risica morna, ls oulhicos del, por ambaixo de las palpebras çcaídas até medran. Cunta-l toda la sue bida, ls sous delores, las sues penas, sien que eilha faga muita cunbersa. Aquel eidoso sólo querie quien l scuitasse!...
Ls outros oulhan cun seinha de zprézio, cumo se eilha fura ua palhantrica, cumo l chamaban quando andába no culeijo an Miranda i se anganhaba i falaba mirandés.
Mas que raio de gente esta tan amperial!
Que raio de gente tan desumana!...