Moçambique

Moçambique
Parque da Gorongosa

Douro

Douro
An cama de mofo

quinta-feira, 7 de maio de 2009

eiraçadica de las lhembranças

...bonda ua eiraçadica cumo que a abanar l miu pelo, las lhembranças bénan. Tocan-me na piel, agarran-me ne l braço i bótan-se a passear cumigo por esses caminos, esses rieiros, arboles adonde me ancabriolei; miro i torno a mirar ls retratos que tengo grabados na alma, biro-ls d´alrobés, tórno-ls a birar d´adreitas i de drento de mi sal-me ua risica serena chena de felcidade. Retratos que quedórun guardados an sítio húmido i assi i todo, nun quedórun mufosos.
A las beçes ye preciso caminarmos sólos para achar l nuosso mundo crabado an cada cachico de l nuosso cuorpo i de la nuossa alma, sien bruidos de outra boç. Chega la nuossa boç muda, ancolhida na gorja para naide la scuitar, yá que aqueilha boç sólo a nós pertence. Ye un ancontro feliç cun l passado que quedou marcado por zancontros mas que maiores que esses, fúrun ls ancontros, tardiegos mas que de tan doces, se achan tempranos.
Las feridas de la alma cada un sabe de las sues i muita beç nun són las que debrebe ls outros l pareçan que seian.
Seian quals fúren hai que las ir lhabando para que nun amalinan, para que l´auga de la alma nun se antrúbie; ye perciso que la alma inda que beia ls relhistros i ouba ls trunos, nun se deixe apanhar pulas chiçpas que todo fulminan...

2 comentários:

Isilda Nascimento disse...

Buonos dies amiga Adelaide!
Nun sei que nome dar a este tou momento de bibencia, ende na Speciosa mas you dirie que la tua mimória rebobinou todos ls filmes guardados i neste momento repassa cun suidade l melhor filme de la tua mocidade i queda to ua suidade daquilo que deixeste para trás..... la tua aldé i subretodo las tuas raizes.
Quier quérgamos ó nao, la tierra fui i será siempre l nuosso eilo de lhigaçon a la bida.
Beisico,
Eisilda

Adelaide Monteiro disse...

Eisilda, mie linda,

Ye un tornar atrás cun muita serenidade i cun felcidade.
A las beçes diç-se quando ua pessona ten problemas que són traumas de l´eifáncia. Para alguns serán, mas ye bien que se fága ua rebisón porque a las beçes nun ye assi, nunye l que parece ser.
Beisicos, amiga.
Delaide

Enviar um comentário

Arquivo do blogue