Moçambique

Moçambique
Parque da Gorongosa

Douro

Douro
An cama de mofo

terça-feira, 5 de maio de 2009

Nuite de lhunar

...debie ser pribido, digo you!
Si, ye un assagar de sonidos!... Tener bidros duplos nua aldé debie de ser pribido.
Cheguei agorica mesmo de casa de mie mãe, de ua punta de la Speciosa, a uns quinhentos metros de la mie que queda ne l meio de l termo antre cerrados i cortinas.
La lhuna an quarto crecente abançado dá ua lhuç mágica i clara que quaije que parece de die.
La nuite nun stá frie.
L´air friu que assoprou a la pormanhana calhou-se lhougo a hora de almuorço.
You i la perra Jomba benimos a caminar, mais ou menos a las dieç de la nuite.
Tan fuorte era l cantar de ls grilhos por estas cortinas que se se tebisse fechado ls uolhos parecie que stabamos ne l Berano a oubir las checharras, al rechuino de l sol.
Ye fantástico que nun se me lembraba que cantasse ua tan grande quantidade de grilhos.
Quando puse la chabe ne la puorta tenie un, esse de la família, que cantaba andrento de l chupón.
Para mie tristeza, an casa, de tan citrada que ye, ne las puortas, jinelas, bidros duplos i todas las modernices, nun se oube nien raça de ls sonidos de la rue.

Hai cousas que nun se puoden çperdiçar; nun sabemos se manhana las poderemos bibir. Besti ua camisola mais caliente, fui pala baranda i eilhi quedei cun un caderno i un lapeç na mano, a mirar la lhuna i a oubir l que la natureza me ouferecie.
Puode ser que naça un poema...

4 comentários:

Isilda Nascimento disse...

Ah amiga Adelaide!
Num fazes eideia de la riqueza dessa tua çcriçon dua guapa nuite de lhunar , nua aldé transmomtana i l bien que faç a la nuossa alma. Bastou-me cerrar ls uolhos i lha staba you a la tu beira a oubir essa serenata al lhuar. Pena que seia solo an pensamiento!
I you que iba preguntar-te se ja tenies oubido ls grilos cantáren!!!!!!!
Cuntinaçon de buona stadie na tua guapa aldé.

Eisilda

Adelaide Monteiro disse...

cerrar la uolhos, abrir l´alma a esta ourquestra que tan bien mos fai!... I apuis, coincé-la, pa la poder oubir an silençio yá ye ua sourte, Eisilda!...
Beisicos para ti
Adelaide

Nial de la Boubielha disse...

Oulá amiga Adelaide

Puode ser que naça un poema...
Fui assi que ancerres-te este testo, cumo quien diç que las manos quédan porqui i por agora, cumo quien diç que l'alma inda stá chena de palabras i rimas, l eimaginairo mágico desse lhunar inda ten muito que para ouferecer.
-Nun hai jinelas nien bidros, nun hai lhemites quando se ten l don de las palabras para çcrebir esse cachicos cumo l faziste neste testo.

Parabienes
Faustino

Adelaide Monteiro disse...

Ah Faustino!
Oubrigada p´la tue besita. Las palabras a las beçes andan a cascalhar cumo las xardas ne la ribeira de Angueira i nun hai canha que las fága salir.
Andando porqui si ye menos custoso; até un sapico sierbe de tema...
Beisicos,

Enviar um comentário

Arquivo do blogue