Moçambique

Moçambique
Parque da Gorongosa

Douro

Douro
An cama de mofo

segunda-feira, 11 de maio de 2009

Rezas para chober i para nun chober

Stá a chober mi bien
Ua auga abençoada
Mete-se toda ne la tierra
Porque nun ye trunada

Staba todo miu seco
Andaba-se siempre a regar
E para que chubisse
Botórun-se a rezar

Rezórun l terço
Nuobe dies seguidos
Al fin Dius oubiu
Todos ls sous pedidos

Inda bien que chubiu
Dan graças a Dius
Cansórun-se a rezar
Las ties i ls tius

San Pedro anda tonto
Cun la gente a pedir
Quieren que benga
Apuis piden para s´ ir

L pior ye quando ben
Cun ua atronada
L fruto queda stroçado
I la tierra rasgada

Que nubre tan negra
Até bén a fungar
A ber se la biramos
Bámos todos a rezar

Butamos fuora la Santa
I dezimos l´ouraçón
Lhebai-mos la nubre
Tirai-mos de la afliçón

Tocamos las campanas
Yá todo mundo sabe
Ye un toque special
A ber se la nubre abre

Ponen la Santica
Pala nubre birada
A ber se nun chuobe
Senão queda molhada

La fin de l´ouraçón
Un milagre se biu
La tronada çfizo-se
I la nubre fugiu

2 comentários:

Isilda Nascimento disse...

Oula amiga Adelaide!
Baia-se alhá a antender las pessonas...
Ja diç miu pai:"- que falta que fazie ua auguica mas que seia bien caida..."; "Se fur para fazer stragos ye melhor que num benga"
Sabes amiga, you siempre fui mui medricas de las troboadas.Entao, quando benie ua daquelhas troboadas cun las nubres a fungar, alhá repetie a mie ladainha:"Santa Barbara bendita que ne l cielo stais scrita (nao sei se ye scrita ó anscrita)cun papel i auga benta, librai-me ls desta tormenta"
Tamien diziades esto na buossa tierra?
Parabenes amiga, ls tous poemas son marabilhosos!
Ua buona sumana
Beisicos,
Eisilda

Adelaide Monteiro disse...

Dezie-la i era essa mesma ouraçón i tamien agarraba un galho de trobisco.
Essa de l auguita bien chobida tamien se diç eiqui! San Pedro stá mi mal, cuitadico! Nun sabe para que lhado se ha-de birar.
Yá me faziste rir, Isilda!
Bs
Adelaide

Enviar um comentário

Arquivo do blogue